Michael Owen aishauri Liverpool kuitosa dili la Bradley Barcola

Liverpool na shinikizo la sokoni

Klabu ya Liverpool inaendelea na jitihada zake za kutafuta mrithi wa kudumu wa nyota Mohamed Salah, huku jina la mshambuliaji wa Paris Saint-Germain (PSG), Bradley Barcola, likiwa mstari wa mbele. Hata hivyo, mshambuliaji wa zamani wa Liverpool, Michael Owen, ametoa angalizo kali kuhusu uhamisho huu.

Baada ya kukosa saini za wachezaji kama Yan Diomande na Michael Olise, Liverpool inaonekana kuelekeza nguvu zake kwa Barcola. Taarifa zinaeleza kuwa mchezaji huyo mwenyewe ameshaonesha nia ya kutoongeza mkataba wake na PSG zaidi ya mwaka 2028, jambo ambalo linafungua mlango wa yeye kuondoka.

Bei ya ‘kizungumkuti’

Changamoto kubwa inayowakabili Liverpool kwa sasa ni gharama ya uhamisho. PSG inaripotiwa kuhitaji kitita cha paundi milioni 145 ili kumwachia nyota huyo, kiasi ambacho Liverpool inakiona kuwa ni kikubwa mno, huku wao wakipanga kutoa kiasi kisichozidi paundi milioni 100.

Akizungumzia suala hilo, Michael Owen anaamini kuwa Liverpool inapaswa kuwa na ujasiri wa kujiondoa kwenye mazungumzo hayo ikiwa bei haitashuka.

“Hiyo inasikika kama gharama isiyo ya kawaida, siyo hivyo? Kwa mchezaji ambaye hajathibitisha uwezo wake katika Ligi Kuu ya Uingereza. Ni wazi amecheza katika ngazi ya juu, lakini lazima kuna wakati ufike useme hapana. Kama bei ikifika paundi milioni 145, hiyo ni pesa nyingi mno inayotisha,” alisema Owen.

Nani mbadala wa Salah?

Awali, Owen alikuwa amependekeza Liverpool imsajili Jarrod Bowen kutoka West Ham United, hatua ambayo aliona ingekuwa na mantiki zaidi. Hata hivyo, fursa hiyo inaonekana kufungwa kwa sasa.

Owen anakiri kuwa Liverpool iko katika wakati mgumu kwani wapinzani sokoni wanajua hitaji la dharura la klabu hiyo ya Anfield kupata winga wa daraja la juu. Hii inawapa wauzaji nguvu ya kupandisha bei kwa sababu wanajua Liverpool haina budi kuwekeza.

“Kuna uhaba wa mawinga wa daraja la juu kwa sasa. Liverpool pengine inahitaji wachezaji wawili wa aina hiyo, na lazima wapate angalau mmoja. Barcola anaonekana kuwa mmoja wa wale waliopo sokoni na wenye ubora, lakini kila kitu kitategemea bei ya mwisho,” aliongeza Owen.