Mjomba wa Yamal amkosoa Kane baada ya kutwaa Ballon d’Or

Mjomba wa Lamine Yamal, Abdul Abdellaoui, ameeleza kutoridhishwa kwake baada ya Harry Kane kutwaa tuzo ya Ballon d’Or, akisema mashabiki wanaopenda soka wangependelea kumtazama nyota huyo wa Barcelona kuliko mshambuliaji wa Bayern Munich.

Kane alipata tuzo hiyo Jumatatu usiku, akiwa Mwingereza wa kwanza kushinda katika kipindi cha miaka 25. Mwingereza wa mwisho kutwaa tuzo hiyo alikuwa Michael Owen mwaka 2001.

Abdellaoui asema Yamal ndiye anayevutia zaidi

Akizungumza na kipindi cha redio cha El Larguero, Abdellaoui alisema alihuzunishwa na matokeo hayo. Alisisitiza kuwa mpwa wake alikuwa na msimu mzuri na alistahili kutambuliwa kwa kiwango chake uwanjani.

“Ukweli ni kwamba inasikitisha sana, najisikia vibaya. Mpwa wangu alikuwa bora; alikuwa mchezaji bora duniani, na kila mtu analijua hilo. Kama unapenda soka, unaenda kumtazama Lamine, si Harry Kane.”

Hata hivyo, Abdellaoui hakupuuza uwezo wa Kane. Alimtaja kama mshambuliaji bora wa kufunga mabao, lakini akasema Yamal ana uwezo wa kung’ara kwa namna tofauti ndani ya mchezo. Aliongeza kuwa huenda Yamal akakosa bahati mwaka huu, lakini atapata nafasi nyingine.

Kane alikuwa akishindana na Yamal pamoja na mshambuliaji wa Real Madrid, Kylian Mbappé, katika kinyang’anyiro cha tuzo hiyo. Msimu uliopita akiwa Bayern Munich, Kane alifunga mabao 61 katika mechi 51 za klabu. Pia aliifungia England mabao sita katika Kombe la Dunia, ambako timu hiyo ilifika hatua ya nusu fainali katika mashindano yaliyofanyika Amerika Kaskazini wakati wa kiangazi.

Abdellaoui alidai umri mdogo wa Yamal huenda ukawa umechangia kutopata tuzo hiyo, akisema mara nyingi huambiwa bado ana muda kwa sababu ana miaka 19. Alisema anaamini Yamal atashinda Ballon d’Or zaidi ya mara moja, ingawa alitarajia huzuni ya kushindwa kupita ndani ya siku chache.

Laporta asema Yamal alistahili

Rais wa Barcelona, Joan Laporta, pia alitoa maoni yake baada ya Yamal kukosa tuzo hiyo mjini London. Alisema ana imani nyota huyo ataishinda siku zijazo, na akaongeza kuwa kwa mtazamo wake Yamal alifanya vya kutosha kuipata safari hii.

Hata hivyo, Laporta alikubali kuwa wapiga kura walifanya uamuzi wao na akasema unapaswa kuheshimiwa kwa moyo wa kiuanamichezo. Aliwataka wachezaji wenzake wa Barcelona kumsaidia Yamal kuvuka haraka hali hiyo na kumpa upendo na sapoti.

Yamal alinyakua tuzo ya mchezaji bora chipukizi duniani kwa msimu wa tatu mfululizo, lakini hakufanikiwa kupata tuzo kuu. Laporta alisifu mafanikio yake tangu akiwa na umri wa miaka 16 na kusema klabu itamsaidia kuendelea kuwa na motisha ya kuwania Ballon d’Or tena mwaka ujao.