Mohamed Salah aondoka Liverpool, kutua Trabzonspor

Safari ya Salah Anfield imefika mwisho

Sakata la hatma ya Mohamed Salah hatimaye limepata majibu rasmi. Mshambuliaji huyo mahiri wa Misri amethibitisha kuondoka Liverpool na sasa anakwenda kuanza sura mpya katika maisha yake ya soka nchini Uturuki akiwa na klabu ya Trabzonspor.

Taarifa hii imekuja baada ya mtaalamu wa masuala ya usajili barani Ulaya, Fabrizio Romano, kutoa kauli yake maarufu ya “here we go”, akithibitisha kuwa makubaliano yamefikiwa baina ya pande zote mbili. Salah anajiunga na klabu hiyo kama mchezaji huru baada ya kuamua kumaliza mkataba wake na Liverpool mapema kabla ya muda uliopangwa.

Mchakato ulivyokuwa mgumu

Kabla ya kutua Trabzonspor, kulikuwa na taarifa nyingi zilizohusisha mshambuliaji huyo na klabu mbalimbali, ikiwemo Beşiktaş ambayo iliripotiwa kuwa kwenye mazungumzo ya awali. Hata hivyo, mambo yalichukua mkondo mpya baada ya Trabzonspor kuingilia kati na kufanikiwa kupata saini ya mchezaji huyo.

Klabu ya Beşiktaş ilikuwa imekanusha vikali taarifa zilizokuwa zikizunguka awali kuhusu makubaliano yoyote, ikidai kuwa ripoti hizo zilikuwa za kubuni. Katika kipindi hicho cha sintofahamu, Trabzonspor walitumia nafasi hiyo vizuri na kufanya mazungumzo ya siri na mwakilishi wa Salah, jambo lililopelekea Beşiktaş kusitisha mazungumzo yao rasmi.

Ofa iliyomshawishi Salah

Trabzonspor wamefanikiwa kumpata mshambuliaji huyo kwa kumpa ofa ya kuvutia ya mkataba wa miaka miwili. Kwa mujibu wa ripoti za ndani, Salah atakuwa akivuna kiasi cha Euro milioni 17 kwa kila msimu katika klabu hiyo mpya.

Uamuzi huu wa Salah unamaliza tetesi zilizokuwa zikienea kwa takriban miaka miwili sasa, ambapo wengi walidhani angeelekea Saudi Arabia au Marekani (MLS). Badala yake, mkongwe huyo wa Anfield ameamua kuendeleza soka lake la ushindani barani Ulaya akiwa na kikosi cha Trabzonspor.

“BREAKING: Mo Salah to Trabzonspor, here we go! Club confirms agreement in place for the Egyptian striker. Salah joins on two-year deal as free agent after leaving Liverpool,” alisema Fabrizio Romano kwenye ukurasa wake wa X.

Mashabiki wa soka duniani sasa wanasubiri kumuona Salah akivaa jezi ya rangi ya bluu na nyekundu ya Trabzonspor na kuona kama ataweza kuendeleza makali yake aliyoyazoea alipokuwa nchini Uingereza.