Mohamed Salah: Chelsea ndiyo chaguo langu la kwanza Uingereza

Mustakabali wa Salah unajibu maswali mengi

Tetesi kuhusu wapi nyota wa Liverpool, Mohamed Salah, ataelekea baada ya msimu huu kumalizika zimechukua sura mpya. Mshambuliaji huyo mahiri amefunguka kuhusu hatua yake inayofuata huku kukiwa na uvumi mwingi juu ya mustakabali wake wa soka.

Ingawa tayari ilikuwa imethibitishwa mwezi Machi kwamba Salah ataiacha Liverpool mwishoni mwa msimu huu, bado haijajulikana rasmi ataelekea wapi. Hata hivyo, ripoti kutoka kwa mwandishi wa habari wa Misri, Ahmed Darwish, zimeibua gumzo kubwa baada ya kudai kuwa Salah yupo mbioni kufanya maamuzi ya mwisho.

Chelsea inapewa kipaumbele

Licha ya kuhusishwa na vilabu vingi nje ya Uingereza, ikiwemo ligi za Saudi Arabia, Marekani (MLS), na Uturuki, Salah ameweka wazi klabu anayoiheshimu zaidi akiamua kubaki ndani ya ardhi ya Uingereza.

Ripoti zinaeleza kuwa Chelsea ndiyo timu pekee inayoweza kumshawishi staa huyo kuendelea kucheza ndani ya Ligi Kuu ya Uingereza. Inadaiwa kuwa ikiwa ‘The Blues’ wataweka ofa mezani, itakuwa ndiyo chaguo la kwanza la Salah kurejea Stamford Bridge, klabu ambayo aliwahi kuitumikia hapo awali.

Ofa mezani

Ushindani wa kumsajili nyota huyo mkongwe ni mkali. Mbali na uwezekano wa kurejea Chelsea, Salah anazo ofa nyingine tatu nzito kutoka nchini Uturuki. Vilabu vya Besiktas, Fenerbahce, na Galatasaray vimeonyesha nia ya dhati ya kutaka huduma yake.

Taarifa pia zimebainisha kuwa ofa zinazotoka Saudi Arabia, ambazo wengi walidhani ndizo zitaongoza, hazijawa na mvuto mkubwa wa kifedha ikilinganishwa na ofa nyingine zilizopo mezani kwa sasa. Hii inafanya mbio za kumsajili mshambuliaji huyo kuwa na ushindani mkubwa zaidi.

Kwaheri Liverpool

Kama sehemu ya kuaga mashabiki wa Liverpool, Salah alitoa ujumbe wa kugusa hisia akionyesha mapenzi yake makubwa kwa klabu hiyo ambayo amedumu nayo kwa muda mrefu.

“Sikufikiria kamwe jinsi klabu hii, jiji hili, na watu hawa wangekuwa sehemu ya maisha yangu. Liverpool si klabu ya soka tu, ni shauku, ni historia, ni roho. Siwezi kuelezea kwa maneno kwa mtu yeyote ambaye si sehemu ya klabu hii.”

Salah alimalizia kwa kusema kuwa atabaki kuwa mmoja wa familia ya Liverpool milele, akisisitiza kuwa klabu hiyo itabaki kuwa nyumbani kwake na familia yake licha ya safari yake kuelekea ukingoni.