Morgan Rogers akataa ofa ya Arsenal, ajiunga na Chelsea kwa ada ya rekodi

Uamuzi mgumu wa Rogers

Staa wa kimataifa wa England, Morgan Rogers, amepiga hodi Stamford Bridge baada ya kufikia makubaliano ya kujiunga na Chelsea akitokea Aston Villa. Usajili huu unakuja ikiwa ni pigo kubwa kwa Arsenal ambao walikuwa wakipambana vikali kumsajili mchezaji huyo mwenye umri wa miaka 23.

Taarifa kutoka kwa mwandishi mahiri David Ornstein zimethibitisha kuwa Chelsea wamekubaliana na Aston Villa kulipa ada ya uhamisho ya pauni milioni 117. Mchezaji huyo anatarajiwa kufanyiwa vipimo vya afya siku ya Jumatatu kabla ya kukamilisha mkataba wake.

Ushawishi wa Xabi Alonso

Inaelezwa kuwa nguzo kuu katika usajili huu imekuwa ni kocha mpya wa Chelsea, Xabi Alonso. Licha ya Arsenal kuonyesha nia ya dhati ya kumsajili kiungo huyo mshambuliaji, Rogers ameweka wazi kuwa alishawishika na mradi wa Alonso na maongezi yao ya ana kwa ana.

“Rogers anataka kujiunga na Chelsea, huku kocha mpya Xabi Alonso na mradi wa klabu hiyo ukiwa kivutio kikubwa kwake. Arsenal walikuwa na nia pia, lakini mchezaji amechagua Chelsea kama sehemu anayopendelea kwenda,” imeelezwa katika ripoti hiyo.

Mkataba mnono na mustakabali

Rogers amekubali kusaini mkataba wa miaka sita utakaomfanya abaki Stamford Bridge hadi mwaka 2032, huku kukiwa na chaguo la kuongeza mkataba wa mwaka mmoja zaidi. Uamuzi huu unampa nafasi ya kuungana na rafiki yake wa karibu, Cole Palmer, jambo ambalo linaaminika kuchochea hamu yake ya kutaka kuhamia London Magharibi.

Ada ya pauni milioni 117 inayolipwa na Chelsea inamfanya Rogers kuwa mmoja wa wachezaji ghali zaidi, ikizidi kidogo ada iliyotumika katika uhamisho wa Elliot Anderson kwenda Manchester City. Hatua hii inaashiria kuanza kwa mabadiliko makubwa katika kikosi cha ‘The Blues’ chini ya utawala mpya wa Alonso.

Arsenal waangalia mbadala

Baada ya kukosa saini ya Rogers, Arsenal sasa wanaelekeza nguvu zao kutafuta malengo mengine ya usajili ili kuimarisha safu yao ya ushambuliaji. Ripoti zinaashiria kuwa ‘The Gunners’ wanawachungulia wachezaji kama Julian Alvarez na Junior Kroupi, huku pia wakihusishwa na Bradley Barcola ambaye anawindwa na vilabu kadhaa vya Ligi Kuu ya England.

Kwa upande wa Chelsea, kukamilika kwa usajili huu kunathibitisha nia yao ya kurudi kileleni mwa soka la England na Ulaya, huku mashabiki wakisubiri kuona ni jinsi gani Alonso atawatumia nyota wake wapya katika msimu ujao.