Jose Mourinho amgomea Manchester United kumhusu Aurelien Tchouameni

Mourinho afunga milango kwa Manchester United

Ndoto za Manchester United kumsajili kiungo mahiri wa Real Madrid, Aurelien Tchouameni, zimepata pigo kubwa baada ya kocha mpya wa klabu hiyo ya Santiago Bernabeu, Jose Mourinho, kusisitiza kuwa hana mpango wa kumuuza mchezaji huyo.

Manchester United wamekuwa wakimnyatia Tchouameni kwa muda mrefu, huku ripoti mbalimbali zikimtaja nyota huyo wa timu ya taifa ya Ufaransa kama chaguo namba moja la klabu hiyo ya Old Trafford kwa ajili ya kuimarisha eneo la kiungo. Hata hivyo, inaonekana juhudi zao zitaendelea kukwama kutokana na msimamo wa Mourinho.

Kiungo muhimu katika mipango ya Mourinho

Kwa mujibu wa taarifa kutoka Hispania kupitia El Debate, Jose Mourinho ambaye amerejea klabuni hapo kwa kipindi chake cha pili, amemuweka Tchouameni katika orodha ya wachezaji wasioguswa. Mourinho anamuona mchezaji huyo kama nguzo muhimu katika kikosi chake, akimfananisha na Federico Valverde ambaye naye pia anatazamwa kama mhimili wa timu.

Ripoti zinaeleza kuwa licha ya kuwepo kwa shinikizo la masoko ya uhamisho na maslahi kutoka Ligi Kuu ya Uingereza (Premier League), kocha huyo Mreno ameweka wazi kuwa hataruhusu kuondoka kwa nyota hao isipokuwa tu kama kutatokea sababu ya msingi au vipaumbele vikubwa zaidi vya usajili.

Changamoto za kifedha kwa United

Mbali na msimamo wa Real Madrid, Manchester United pia wanakabiliwa na changamoto nyingine mbili kubwa katika jaribio lao la kumnasa Tchouameni. Mchambuzi maarufu wa masuala ya usajili, Fabrizio Romano, amebainisha kuwa gharama za usajili huo ni kikwazo kikubwa.

“Kuna uhakika kuwa Manchester United wanamtaka sana Tchouameni na wanamuona kama mchezaji mkamilifu, lakini kwa upande wa uhalisia, inategemea na Real Madrid ambao hawajafungua mlango wowote wa kuondoka kwake, na pili ni mishahara yake mikubwa ambayo ni ngumu kwa United kuimudu kwa sasa,” alisema Romano.

Kushindwa kwa Manchester United kumsajili Mateus Fernandes, aliyetimkia Tottenham Hotspur, kumeifanya klabu hiyo chini ya kocha Michael Carrick kuendelea kutafuta mbadala wa kudumu kwenye eneo la kiungo mkabaji. Hata hivyo, inaonekana Aurelien Tchouameni hataondoka Madrid wakati huu huku Mourinho akijenga upya jeshi lake kwa ajili ya msimu ujao.