Mustakabali wa Martin Odegaard ndani ya Arsenal wazua mjadala mzito

Mustakabali wa Martin Odegaard shakani

Mustakabali wa nahodha wa Arsenal, Martin Odegaard, umeanza kuwekwa kwenye utata huku kukiwa na taarifa kuwa kiungo huyo anaweza kuondoka klabuni hapo katika dirisha hili la usajili la majira ya joto. Licha ya kuwa nguzo muhimu katika misimu iliyopita, msimu uliopita haukuwa mzuri kwake kutokana na changamoto za majeraha na kuporomoka kwa kiwango.

Ripoti mbalimbali nchini Uingereza zinaashiria kuwa uongozi wa Arsenal na kocha Mikel Arteta wanapanga kufanya usajili mkubwa wa ‘marquee signing’ ili kuimarisha safu ya kiungo. Hali hii imeibua maswali juu ya nafasi ya Odegaard katika kikosi cha kwanza kwa msimu ujao.

Maoni ya wadau kuhusu kuondoka kwake

Mick Brown, aliyewahi kuwa mkuu wa skauti wa Manchester United, amedai kuwa hatashangaa kuona nyota huyo wa Norway akipaki virago vyake na kuondoka Emirates.

“Inawezekana akaondoka. Mwanzoni mwa msimu uliopita, tishio kubwa la Arsenal lilikuwa ushirikiano wa Odegaard na Bukayo Saka. Walikuwa wakicheza vizuri sana. Lakini alipopata majeraha na kutoka kwenye kikosi, timu ilishindwa kupata uwiano uleule wa mchezo. Nimesikia taarifa za uwezekano wa yeye kuondoka, na kwangu mimi haitakuwa mshangao mkubwa kama ikitokea.”

Nani anayeweza kumrithi?

Kati ya majina yanayotajwa kuchukua nafasi hiyo ni kiungo wa Aston Villa, Morgan Rogers, na Morgan Gibbs-White. Mchezaji wa zamani wa Arsenal, Alan Smith, anaamini kuwa usajili wa Rogers unaweza kuwa na mantiki kwa timu hiyo.

Smith anasisitiza kuwa Arsenal itahitaji kupata fedha nzuri kutokana na mauzo ya Odegaard ili kuwezesha usajili wa wachezaji wapya wenye viwango vya juu kama Rogers. Hata hivyo, changamoto kubwa ni bei ya wachezaji katika soko la sasa la usajili, ambapo kila mchezaji bora anatajwa kuwa na thamani ya karibu pauni milioni 100.

“Huwezi kumleta Rogers bila ya kuwa na mtu anayeondoka, hasa ukizingatia kuna wachezaji wengine kama Eberechi Eze ambao wanacheza nafasi inayofanana. Ni wazi kuwa Aston Villa wataweka bei ya juu kwa sababu Rogers ni kijana, mchezaji wa timu ya taifa ya England na amethibitisha ubora wake ndani ya Ligi Kuu ya Uingereza,” aliongeza Smith.

Arsenal sasa inakabiliwa na maamuzi magumu ya kama wataendelea kumtegemea nahodha wao huyo au watafanya mabadiliko makubwa ili kusaka mafanikio zaidi msimu ujao.