Mvutano mkali: Nchi za Ulaya zatishia kususia Kombe la Dunia

Mgogoro mzito waibuka FIFA

Soka la dunia linakabiliwa na mtikisiko mkubwa baada ya nchi za Ulaya kuanza mazungumzo ya kususia michuano ya Kombe la Dunia. Mgogoro huu umechochewa na taarifa za Rais wa FIFA, Gianni Infantino, anayetaka kuuza asilimia fulani ya hisa za chombo hicho cha soka duniani.

Mpango huo unaelezea kuundwa kwa idara mpya ndani ya FIFA ambayo itakuwa na mamlaka ya kusimamia Kombe la Dunia na michuano mingine mikubwa, huku Infantino akionekana kulenga kupata mapato makubwa kupitia uuzaji huo. Wanachama wa FIFA wamepewa hadi katikati ya Septemba kufanya maamuzi kuhusu pendekezo hili.

UEFA yagoma vikali

Shirikisho la Soka la Ulaya (UEFA) limesema wazi kuwa halikufurahishwa na mpango huo, hasa kwa kuzingatia kuwa walipata taarifa hizo kupitia vyombo vya habari bila kushirikishwa awali. Katika tamko rasmi, UEFA ilieleza kuwa hatua hii ni kinyume na misingi ya soka.

“Hii imevuka mstari ambao taasisi zinazoongoza soka hazipaswi kuuvuka. UEFA inalichukulia hili kwa uzito mkubwa, kama ambavyo kila shirikisho la taifa, klabu, wachezaji na mashabiki wanapaswa kufanya. Roho na utawala wa soka si mali ya kuuzwa. Soka si mali ya FIFA pekee,” ilisema taarifa hiyo ya UEFA.

Kombe la Dunia linaweza kukosa thamani?

Maoni ya wadau wa soka yanaonyesha kuwa Kombe la Dunia litapoteza hadhi yake endapo nchi kubwa za Ulaya kama Uingereza, Hispania, Ufaransa, Ujerumani na Italia zitaamua kususia michuano hiyo.

Mchambuzi Stan Collymore amedai kuwa bila ushiriki wa mataifa haya makubwa, Kombe la Dunia litakuwa “batili” kwani nguvu kuu ya soka duniani inatoka barani Ulaya. Collymore anaamini kuwa ni wakati mwafaka kwa UEFA kusimamia sheria za soka duniani na kujitenga na FIFA.

“Kama Ufaransa, Italia, Ujerumani, Uingereza, Hispania, Uholanzi na Ureno watasusia, basi kombe hilo litakuwa batili moja kwa moja. Hii ni kweli. FIFA inaihitaji UEFA, lakini UEFA haihitaji FIFA,” aliongeza Collymore kwenye maoni yake.

Kwa sasa, nchi za Ulaya zinaendelea na mikutano ya dharura ili kuandaa msimamo mmoja. Dunia ya soka inasubiri kuona hatua zitakazofuata huku mustakabali wa michuano mikubwa ya FIFA ukiwa shakani.