Newcastle United wajipanga kumsajili Lucas Bergvall kutoka Tottenham

Newcastle United wajipanga kumsajili Lucas Bergvall

Klabu ya Newcastle United inatajwa kuwa katika nafasi nzuri ya kuanza mchakato wa kumsajili kiungo wa Tottenham, Lucas Bergvall, kufuatia mipango inayotajwa kufanywa na uongozi wa klabu hiyo ya St. James’ Park. Hata hivyo, inaelezwa kuwa ‘Magpies’ hao wameamua kuwa na subira kidogo kabla ya kuwasilisha ofa yao rasmi.

Ripoti kutoka vyombo mbalimbali vya habari nchini Uingereza zinaonyesha kuwa Newcastle wanasubiri hadi tarehe 16 Agosti ili kufanya hatua yao ya kwanza. Uamuzi huu unatajwa kuhusishwa na kanuni mpya za UEFA kuhusu uhamisho wa wachezaji, hasa kutokana na mazingira yanayozunguka uhamisho wa Sandro Tonali kutoka Newcastle kwenda Tottenham mapema mwezi Julai.

Kwa nini tarehe 16 Agosti ni muhimu?

Mshauri wa zamani wa masuala ya fedha wa Manchester City, Stefan Borson, amebainisha kuwa kusubiri huku ni mkakati wa kuepuka kuhesabika kwa uhamisho huo kama sehemu ya ‘kubadilishana wachezaji’ (player exchange). Kwa mujibu wa sheria za UEFA, kuna kipindi cha siku 45 ambacho kinapaswa kupita ili kuepuka changamoto za kikanuni baada ya uhamisho uliotangulia.

“Wanaweza kuwa wanasubiri ili kuona nini kinatokea na Newcastle, kwa sababu wanahitaji kusubiri siku 45 zipite ili isihesabike kama ubadilishaji wa wachezaji kufuatia uhamisho wa Sandro Tonali,” alisema Borson.

Changamoto ya bei ya Bergvall

Tottenham inaonekana kutokuwa tayari kumwachia kiungo huyo kwa urahisi. Mchambuzi wa soka Gianluca Di Marzio amedokeza kuwa Spurs tayari wamekataa ofa ya Euro milioni 50 kutoka kwa klabu mbalimbali za Uingereza. Inafahamika kuwa klabu hiyo ya London inataka kiasi kisichopungua pauni milioni 60 ili kumruhusu staa huyo wa kimataifa wa Sweden kuondoka.

“Wamekataa ofa ya Euro milioni 50 kutoka kwa klabu za Uingereza, hivyo itakuwa vigumu kufanya biashara hii. Hawatamruhusu aondoke kwa Euro milioni 50, na kupata Euro milioni 60 au zaidi inaweza kuwa changamoto, lakini bei yao ni kubwa zaidi ya ofa walizopokea hadi sasa,” aliongeza Di Marzio.

Hali ya Newcastle katika usajili

Msimu huu wa joto, Newcastle wamefanya usajili wa wachezaji kama Ewen Jaouen, Bazoumana Touré, Sean Steur, na Aladji Bamba. Hata hivyo, baadhi ya mashabiki na wachambuzi wamekuwa na shaka na mwelekeo wa kikosi hicho kufuatia kuondoka kwa nyota kama Anthony Gordon na Sandro Tonali, huku kukiwa na minong’ono mingi juu ya hatma ya Bruno Guimaraes ambaye anahusishwa na kutimkia Arsenal.

Bergvall, ambaye nafasi yake imekuwa finyu kufuatia usajili mpya uliofanywa na Tottenham, anawaniwa pia na klabu nyingine za Ligi Kuu ya Uingereza kama Nottingham Forest na Brighton. Itakuwa vyema kuona kama Newcastle watafikia dau hilo la pauni milioni 60 ifikapo Agosti 16 ili kumpata kiungo huyo kijana.