Newcastle wajipanga: Bruno Guimaraes aibua hofu, Felix Nmecha akihusishwa

Newcastle watazama mbadala huku presha ikiongezeka

Klabu ya Newcastle United inaripotiwa kuanza kufuatilia kwa karibu hali ya kiungo wa Borussia Dortmund, Felix Nmecha. Hatua hii inaonekana kama mkakati wa kocha Eddie Howe kujiimarisha katikati ya uwanja, wakati ambapo klabu hiyo ikikabiliwa na uwezekano wa kumpoteza nahodha wao, Bruno Guimaraes.

Ripoti zinaeleza kuwa Newcastle wamekuwa wakimfuatilia Nmecha tangu mwaka 2023, hata kabla ya kumsajili Sandro Tonali kutoka AC Milan. Hata hivyo, dili hili halitakuwa rahisi kwa sababu Borussia Dortmund wameweka dau la juu kwa mchezaji huyo ambaye kwa sasa anajikita kwenye maandalizi ya Kombe la Dunia akiwa na timu ya taifa ya Ujerumani.

Arsenal waongeza kasi kwa Bruno Guimaraes

Wakati Newcastle wakiangalia mbadala, shinikizo kutoka kwa Arsenal linaonekana kuongezeka. The Gunners wanaelezwa kuandaa ofa ya pili ambayo inatarajiwa kufikia paundi milioni 80 ili kumpata kiungo huyo raia wa Brazil.

Inadaiwa kuwa Arsenal wamekuwa na mazungumzo ya kina na wawakilishi wa mchezaji huyo, jambo ambalo limeongeza imani ndani ya klabu hiyo ya London kuwa wanaweza kufanikisha usajili huo iwapo tu watafikia makubaliano ya kifedha na Newcastle. Ingawa Newcastle wamekuwa wakisisitiza kuwa hawana mpango wa kumuuza mchezaji wao huyo muhimu, klabu hiyo inaelezwa kuwa inaweza kubadilisha msimamo iwapo ofa itazidi matarajio yao.

Changamoto za soko kwa Manchester United

Felix Nmecha, mwenye umri wa miaka 25, pia amekuwa akihusishwa kwa karibu na Manchester United. Hata hivyo, wachambuzi wa soka wanaamini kuwa usajili huu unaweza kuwa mgumu kutokana na bei ya juu iliyowekwa na klabu yake ya sasa.

“Nadhani hii itakuwa ni negosheisheni ngumu, na ni bei ambayo inaweza kupanda kadiri dirisha la usajili linavyoendelea na baada ya Kombe la Dunia,” alieleza Ben Jacobs, mchambuzi wa masuala ya soka.

Kwa sasa, inaonekana klabu kubwa za Ligi Kuu ya England zinasubiri kuona hatma ya mchezaji huyo baada ya mashindano ya kimataifa, huku Borussia Dortmund wakiwa hawana haraka ya kumwachia mchezaji wao ambaye mshahara wake unatarajiwa kuongezeka katika msimu ujao.