Nico O’Reilly amjibu Haaland: Hizi ni mbinu za kisaikolojia tu

Vita ya maneno kabla ya robo fainali

Kuelekea mchezo mkali wa robo fainali ya Kombe la Dunia kati ya England na Norway utakaopigwa jijini Miami, beki wa England, Nico O’Reilly, ameweka wazi kuwa haingii kwenye mtego wa maneno ya Erling Haaland.

Haaland, ambaye ni mwenzake O’Reilly katika klabu ya Manchester City, amekuwa akijaribu kuipamba England kama timu kubwa na inayobeba presha yote kuelekea mchezo huo. Hata hivyo, O’Reilly anaamini kuwa haya ni mambo ya kawaida ya mchezaji huyo.

Mbinu za kisaikolojia za Haaland

Katika mahojiano yake, Haaland alidai kuwa England ndio wanapendelewa zaidi kushinda taji hilo, huku akisisitiza kuwa Norway haijawahi kufika hatua hiyo na kwao kufika robo fainali ni jambo la kushangaza hata kwake.

“Kuna timu zinazopendelewa, na England ni moja wapo, hivyo nadhani nyie wote mnapaswa kuweka presha yote kwa vijana wa England!” Haaland aliwaambia wanahabari.

O’Reilly alipoulizwa kuhusu kauli hiyo ya ‘unyenyekevu’ kutoka kwa Haaland, hakusita kuonyesha kuwa anajua nini kinaendelea.

“Ndiyo, hizo ni mbinu za kisaikolojia (mind games). Lakini wao ni timu nzuri pia. Wameonyesha hivyo katika mashindano yote. Sio wachezaji fulani tu ambao tunapaswa kuwa na wasiwasi nao, wana umoja mzuri kama timu,” alisema O’Reilly.

Kumlinda Haaland

Licha ya urafiki wao, O’Reilly anatambua vyema hatari ya mshambuliaji huyo ambaye amefunga mabao saba katika mechi nne za Kombe la Dunia mpaka sasa. Kwa mtazamo wake, kumlinda Haaland ni ufunguo wa ushindi kwa England.

“Erling ni Erling. Sote tunajua alivyo. Anaweza kufunga mabao, ni hatari sana ndani ya eneo la hatari. Lakini lazima wapate njia ya kumfikishia mpira kwanza. Nadhani kumtuliza Erling kutatupa nafasi kubwa ya kushinda mchezo huu,” aliongeza beki huyo.

Changamoto kwa Thomas Tuchel

Wakati mchezo huo ukikaribia, kocha wa England, Thomas Tuchel, anakabiliwa na wakati mgumu kutokana na majeruhi na magonjwa kambini. Beki wa kati Marc Guehi ana shaka ya kucheza kutokana na tatizo la misuli ya paja (hamstring), huku kiungo Declan Rice akikosa mazoezi ya timu hiyo kwa siku mbili zilizopita kutokana na kuumwa, ingawa bado kuna matumaini anaweza kuwepo uwanjani.