Pape Matar Sarr nje ya Tottenham: Juventus, Monaco na Galatasaray zanyemelea

Hatima ya Pape Matar Sarr Tottenham imefika mwisho

Klabu ya Tottenham Hotspur imeweka wazi kuwa iko tayari kumuuza kiungo wake, Pape Matar Sarr, kabla ya dirisha la usajili kufungwa Jumanne hii. Mchezaji huyu wa kimataifa wa Senegal amekuwa akihusishwa na kuondoka klabuni hapo baada ya kupoteza nafasi katika kikosi cha kwanza cha kocha Roberto De Zerbi.

Tangu ajiunge na Spurs akitokea FC Metz mwaka 2021, Sarr amecheza jumla ya mechi 141, akifunga mabao 11 na kutoa pasi 11 za mabao. Hata hivyo, usajili mkubwa uliofanywa na Spurs msimu huu, ikiwemo kuwasili kwa Mateus Fernandes na Sandro Tonali kwa gharama kubwa, kumeonekana kumsukuma Sarr nje ya mipango ya kocha.

Vita vya usajili: Juventus vs Monaco na Galatasaray

Kulingana na mtaalamu wa usajili Fabrizio Romano, Sarr tayari amependekezwa kwa klabu ya Juventus. Hii inakuja baada ya juhudi za ‘Bibi Kizee’ kumsajili Franck Kessie kugonga mwamba, hivyo kumfanya Sarr kuwa chaguo lao mbadala la kuimarisha safu ya kiungo.

“Pape Matar Sarr amepelekwa Juventus kama chaguo la kiungo baada ya dili la Kessie kufeli. Anaruhusiwa kuondoka Tottenham na mazungumzo tayari yanaendelea na Monaco, ambao wapo mstari wa mbele katika kinyang’anyiro hiki,” alieleza Romano.

Mbali na Juventus na Monaco, klabu ya Galatasaray ya Uturuki nayo imekuwa ikijaribu kumsajili mchezaji huyo. Ripoti nchini Uturuki zinasema Galatasaray wameshakubaliana na mchezaji mwenyewe kuhusu maslahi binafsi, lakini ofa yao ya pauni milioni 17 ilikataliwa na Spurs, ambao wanahitaji kiasi kisichopungua pauni milioni 21 ili kumwachia.

Kevin Danso naye ajitokeza kwenye mlango wa kutokea

Si Sarr pekee anayeweza kuondoka Tottenham kabla ya dirisha kufungwa. Beki Kevin Danso naye anatajwa kuwa na uwezekano mkubwa wa kuondoka ili kutafuta muda wa kucheza mara kwa mara.

Kocha De Zerbi anaonekana kuwa na chaguzi nyingi kwenye safu ya ulinzi, ikiwemo uwepo wa wachezaji kama Micky van de Ven na Senesi, jambo linalomfanya Danso kukosa nafasi ya kudumu. Ingawa Sunderland walionyesha nia ya kumchukua kwa mkopo, Tottenham wamekataa ofa hiyo, jambo linaloashiria kuwa klabu hiyo inaweza kuwa tayari kusikiliza ofa za kudumu kwa beki huyo katika siku hizi za mwisho za dirisha la usajili.