Paul Parker amponda Bellingham, adai Anthony Gordon alikuwa "mzigo" England dhidi ya Croatia
Licha ya timu ya taifa ya England kupata ushindi muhimu wa mabao 4-2 dhidi ya Croatia kwenye mchezo wa Kombe la Dunia, mambo hayajawa shwari kwa baadhi ya nyota wa kikosi hicho. Beki wa zamani wa timu hiyo na klabu ya Manchester United, Paul Parker, ameacha gumzo baada ya kudai kuwa kiungo wa Real Madrid, Jude Bellingham, “hana umuhimu mkubwa” kwenye kikosi cha kocha Thomas Tuchel.
England ilionyesha kiwango kizuri kwenye mchezo huo wa Kundi L na kujiweka kwenye nafasi nzuri ya kutinga hatua inayofuata. Mabao mawili ya Harry Kane katika kipindi cha kwanza yalifutwa na Martin Baturina na Petar Musa, kabla ya Bellingham na Marcus Rashford kupachika mabao mengine kipindi cha pili na kuhakikisha ushindi huo mnono.
Hata hivyo, ushindi huo haukumzuia Parker kutoa maoni yake makali kuhusu kiungo huyo mbunifu wa Real Madrid.
”Bellingham si mchezaji tegemeo England”
Ingawa Bellingham alifunga bao zuri la juhudi binafsi dhidi ya Croatia, Parker anaamini kuwa mchezaji huyo bado hajafikia kiwango cha kuwa tegemeo kubwa kwenye kikosi cha Tuchel, akidai kuwa timu hiyo inamtegemea zaidi Harry Kane.
Akizungumza na Betarades, Parker alisema:
“Simtazami Jude Bellingham kama mchezaji tegemeo. Nasema ukweli tu, hana umuhimu mkubwa sana. Kikosi hiki kinamtegemea sana Harry Kane, na kwa hakika si Jude Bellingham. Simchukulii Bellingham kama mchezaji muhimu kwa sababu sioni kama kiwango cha England kitashuka sana hata kama akicheza vibaya. Hawamtegemei yeye. Kuna wachezaji wengine wanaweza kuingia na kufanya kazi sawa na hiyo, au labda hata bora zaidi.”
Parker aliongeza kuwa kiwango cha Bellingham kimekuwa kikiyumba sana huku akimlinganisha na viungo wengine wa timu hiyo.
“Bado ana safari ndefu na huwezi kumtegemea sana kwa sababu kiwango chake kinapanda na kushuka. Huwezi kujua utapata nini kutoka kwake siku hiyo. Unajua utapata nini kutoka kwa Declan Rice au Andersen, lakini kamwe huwezi kujua kuhusu Bellingham.”
Sifa kemkem kwa Harry Kane
Tofauti na Bellingham, Parker alimtaja nahodha Harry Kane kama muhimili mkuu wa timu hiyo na kusifu mchango wake mkubwa uwanjani akidai kuwa mchezo wake dhidi ya Croatia ulikuwa bora zaidi kuwahi kuuona kutoka kwake.
“Kama ningesema mambo mabaya kuhusu Harry Kane kama nilivyowahi kufanya huko nyuma, nadhani kila mtu angenitilia shaka. Tukizungumzia kiwango cha jumla uwanjani, mchezo ambao Kane alicheza dhidi ya Croatia ni bora zaidi kuwahi kuuona kutoka kwake. Hakuwa tu mshambuliaji wa kati, alikuwa kama mchezaji anayeanzisha mashambulizi kutokea nyuma (quarterback).”
Parker alitumia fursa hiyo pia kuponda mtindo wa uchezaji wa Declan Rice huku akimsifu Kane kwa jinsi alivyobadilika tangu ahamie Ujerumani kuchezea Bayern Munich.
“Tukiangalia kiungo cha England, hatuna wachezaji wanaopenda kupiga pasi za mbele. Declan Rice anajua kupiga pasi za pembeni na nyuma tu. Bellingham anakimbia sana uwanjani, lakini Harry Kane daima anafikiria kupiga pasi ya mbele yenye madhara. Kwangu mimi, kiwango chake kilikuwa cha kustaajabisha. Hata kazi yake ya kuzuia ilikuwa nzuri sana, alikuwa akipambana kama mbwa wa uwindaji kufukuza mawindo yake.”
Gordon aonekane “mzigo” uwanjani
Mchezaji mwingine aliyekumbana na ukosoaji mkubwa wa Parker ni winga wa Newcastle United, Anthony Gordon. Parker alidai kuwa uamuzi wa Tuchel kumuanzisha Gordon ulikuwa makosa makubwa na uliifanya England ionekane kama ipo pungufu ya mchezaji mmoja uwanjani.
“Gordon alikuwa mbovu sana dhidi ya Croatia. Watu watasema alijitahidi kukimbia na kupambana, lakini unahitaji zaidi ya hilo. Yupo pale kusababisha matatizo kwa wapinzani, lakini yeye alisababisha matatizo kwa England yenyewe kwa sababu walikuwa kama wachezaji kumi uwanjani kutokana na yeye kuwepo.”
Parker alihitimisha kwa kusema kuwa atashangaa sana kama Tuchel atamuanzisha tena Gordon kwenye mchezo ujao dhidi ya Ghana, akidai kuwa Marcus Rashford anastahili nafasi hiyo zaidi yake.