Paul Ince akosoa usajili wa Man Utd, ahoji thamani ya Baleba na Santos

Ince ahoji matumizi ya pesa Old Trafford

Kiungo wa zamani wa Manchester United, Paul Ince, ametoa maoni yake mazito kuhusu mikakati ya klabu hiyo katika dirisha la usajili lililopita. Ince anaamini kuwa uongozi wa INEOS haukufanya uamuzi sahihi kwa kutumia kiasi kikubwa cha fedha kusajili viungo wawili, Carlos Baleba na Andrey Santos.

Manchester United ilitumia kiasi cha pauni milioni 120 kuwanasa wachezaji hao wawili kama sehemu ya mpango wa kuboresha safu yao ya kiungo, sambamba na kuwasili kwa Youri Tielemans. Hata hivyo, Ince anaona kuwa hatua hiyo imeiacha timu ikiwa na upungufu katika maeneo mengine muhimu kama vile beki wa pembeni na mshambuliaji.

”Sielewi kwanini wamesajili viungo hawa”

Katika mahojiano yake, Ince alionyesha kushangazwa na sera hiyo ya usajili, akisisitiza kuwa klabu tayari ina hazina ya kiungo kwenye timu hiyo, kijana Kobbie Mainoo.

“Sielewi kwanini United wangenunua Santos kwa pauni milioni 50 na Baleba kwa pauni milioni 70 wakati tayari wanaye Mainoo. Nilihisi kulikuwa na maeneo mengine ambayo pesa hizo zingeweza kutumika. Labda kwenye eneo la beki wa pembeni au mshambuliaji ili kuwasaidia kushindania nafasi mbili au tatu za juu,” alisema Ince.

Changamoto kwa Mainoo

Mbali na kuhoji usajili huo, Ince ametoa ushauri kwa Kobbie Mainoo ili kukuza kiwango chake. Ingawa anakiri kuwa kijana huyo ana uwezo mkubwa, Ince anataka kuona Mainoo akichukua majukumu zaidi uwanjani na kutocheza kwa tahadhari kubwa.

Ince, ambaye alikuwa kiungo mahiri wakati wa kipindi chake, anataka kuona Mainoo akivuta mpira mbele zaidi badala ya kupiga pasi fupi za pembeni au kumtegemea Bruno Fernandes pekee.

“Nataka kuona mtu anayechukua udhibiti wa mchezo. Sitaki kuona mtu anayepokea mpira na kupiga pasi fupi au kumpa Bruno Fernandes. Nataka kuona mtu anayevuta mpira mbele, anayefanya kuta (one-twos). Ana uwezo mkubwa wa miguuni na ana sifa zote, anahitaji tu kuanza kuzionyesha zaidi,” aliongeza Ince.

Kwa mtazamo wa Ince, Mainoo anapaswa kuacha soka la ‘usalama kwanza’ na kuanza kuamini katika uwezo wake binafsi ili kuwa mchezaji muhimu zaidi kwa Manchester United msimu huu.