Paul Merson: Roberto De Zerbi anazua utata ndani ya Tottenham

Presha inapanda kwa De Zerbi

Mchambuzi wa soka nchini Uingereza, Paul Merson, amewatahadharisha mashabiki wa Tottenham Hotspur kuanza kuwa na wasiwasi na mwenendo wa kocha wao, Roberto De Zerbi. Licha ya klabu hiyo kutumia zaidi ya pauni milioni 300 katika dirisha la usajili la hivi karibuni ili kuimarisha kikosi, mwanzo wa msimu huu umekuwa mgumu.

Tottenham, ambao msimu uliopita walihangaika kuepuka kushuka daraja kabla ya kumnasa De Zerbi, bado wanaonekana kutojipata. Hivi karibuni, kocha huyo ametoa lawama za wazi ambazo Merson anaamini ni ishara ya hatari kwa mustakabali wake klabuni hapo.

Lawama za hadharani ni ‘bendera nyekundu’

Baada ya sare tasa dhidi ya Nottingham Forest mwishoni mwa wiki, De Zerbi hakusita kuwatahadharisha wachezaji wake wa safu ya ushambuliaji, huku pia akilalamikia timu ya madaktari kwa madai ya kuingilia maamuzi yake ya mabadiliko ya wachezaji uwanjani.

Kwa mujibu wa Merson, tabia ya kocha kuanika matatizo ya ndani hadharani ni kitu kinachopaswa kuleta taharuki. Akizungumza na Sky Sports, Merson alisema:

“Roberto De Zerbi aliwashambulia washambuliaji wake baada ya mchezo. Pia aliwashambulia wahudumu wake wa afya kwa kudhibiti mabadiliko yake. Unapaswa kusema hayo chumbani (dressing room); usitoke nje na kuyasema. Unahitaji kuweka mambo hayo kuwa ya ndani. Hilo lingenipa wasiwasi kama shabiki wa Spurs. De Zerbi huwa anagombana na watu.”

Kumbukumbu ya Enzo Maresca

Merson alilinganisha hali hii na kile kilichotokea kwa Enzo Maresca akiwa Chelsea, ambapo naye alilalamikia timu ya madaktari kuhusu mabadiliko ya wachezaji kabla ya kuondoka klabuni hapo wiki chache baadaye. Hata hivyo, Merson anajiuliza ni kwanini kocha anaruhusu wahudumu wa afya wamuelekeze nani atoke, kwani yeye ndiye bosi wa benchi la ufundi.

Kuhusu safu ya ushambuliaji, Merson haoni sababu ya msingi ya kocha kuwalalamikia wachezaji wake:

“Sielewi kwanini anawashambulia washambuliaji. Hawakuwa na nafasi 20. Sikuona kama kipa wa Nottingham Forest alikuwa mchezaji bora wa mchezo. Sikuona hayo kabisa.”

Je, Tottenham inaweza kufika wapi?

Kwa mtazamo wa Merson, matumaini ya mashabiki wa Tottenham yanapaswa kuwa ya wastani. Anasema klabu hiyo haipaswi kujilinganisha na timu kubwa kama Manchester City, Liverpool, Chelsea au Arsenal kwa sasa. Badala yake, anadhani kumaliza katika nafasi ya tano ndiyo lengo pekee linaloweza kufikiwa.

“Kuna safari ndefu kwa Spurs. Lakini tatizo langu ni akili ya ushindi (mentality). Huwezi kushika nafasi ya 17 kwa misimu miwili mfululizo halafu ukategemea kubadilisha mambo kwa sekunde moja. Watu wanatakiwa kuwa na subira,” alihitimisha Merson.