Paul Scholes aibua utata kuhusu nafasi ya Matheus Cunha ndani ya Man Utd

Uamuzi wa Carrick wazua maswali

Gwiji wa Manchester United, Paul Scholes, ametoa maoni mazito kuhusu mwenendo wa kikosi cha Michael Carrick, akilenga zaidi namna anavyowapanga wachezaji wake uwanjani. Katika mchezo uliopita dhidi ya Everton uliomalizika kwa sare ya 2-2, Carrick alimtumia Matheus Cunha kama mshambuliaji wa kati, jambo ambalo Scholes anaamini si sahihi.

Scholes, ambaye ni mkongwe wa klabu hiyo, ameeleza bayana kuwa United inapoteza makali inapocheza bila kuwa na mshambuliaji halisi wa kati (namba 9). Wakati Cunha akianza katika nafasi hiyo, Benjamin Sesko ambaye ni mshambuliaji wa asili alikaa benchi hadi dakika ya 70 alipoingia kuchukua nafasi hiyo.

Cunha ni nani hasa?

Akizungumza kwenye podcast ya The Good, The Bad and The Football, Scholes alisema kuwa utata uliopo kwa Matheus Cunha ni kama ule uliopo kwa Joshua Zirkzee, ambaye naye amekuwa akipata wakati mgumu kutafuta nafasi yake kamili ndani ya mfumo wa Carrick.

“Kwa Cunha, hatujui hasa yeye ni nini. Je, ni namba 10 au mchezaji wa pembeni? Lakini kitu kimoja kilicho wazi ni kuwa yeye si namba tisa. Kuangalia Manchester United wakicheza bila namba tisa ni kazi ngumu sana,” alisema Scholes.

Scholes aliongeza kuwa katika mchezo huo dhidi ya Everton, United ilikosa uthubutu na haikwenda kuwafuata wapinzani wao walipokuwa na nafasi, jambo ambalo linatokana na ukosefu wa mtu sahihi wa kuongoza safu ya ushambuliaji.

Changamoto ya Joshua Zirkzee

Sio Cunha pekee anayekabiliwa na sintofahamu ya nafasi yake. Joshua Zirkzee naye amekuwa akizungumziwa sana, hasa baada ya taarifa za klabu hiyo kutaka kumtoa kwa mkopo katika dirisha la usajili lililopita. Zirkzee mwenyewe aliwahi kueleza kuwa yeye ni mchezaji wa kipekee anayejitambulisha kama ‘9.5’, kwani hapendi kubaki kama namba 9 wa kawaida wala namba 10 pekee.

Licha ya presha hiyo, kocha Michael Carrick bado anasisitiza kuwa Zirkzee ana umuhimu mkubwa ndani ya kikosi chake.

“Hakika Josh ni muhimu sana kwa timu na kwa kina cha kikosi chetu. Yeye ni mchezaji mwenye furaha hapa na nina uhusiano mzuri sana naye. Anatamani kucheza zaidi, na hiyo ndiyo ushindani mzuri tunaouhitaji,” alisema Carrick hivi karibuni.

Ni dhahiri kuwa Carrick anaamini katika mfumo wake, lakini kwa wachambuzi kama Scholes, ukosefu wa ‘namba tisa’ halisi ni mwiba unaoendelea kuisumbua Manchester United katika harakati zao za kutafuta matokeo bora.