Paul Scholes aishauri Man Utd kumsajili Cristian Romero na Adam Wharton

Scholes aona umuhimu wa kuimarisha safu ya ulinzi na kiungo

Gwiji wa Manchester United, Paul Scholes, ameweka wazi maoni yake kuhusu maeneo ambayo klabu hiyo ya Old Trafford inapaswa kuyafanyia kazi kabla ya kufungwa kwa dirisha la usajili la majira ya joto. Scholes anaamini kuwa United inahitaji kuongeza nguvu katika nafasi ya ulinzi wa kati na kiungo ili kuwa tishio msimu ujao.

Kwa mujibu wa Scholes, Manchester United inapaswa kufanya kila liwezekanalo kumsajili beki wa Tottenham Hotspur, Cristian Romero. Ingawa beki huyo wa Argentina amekuwa akihusishwa zaidi na kutimkia Atletico Madrid, Scholes anaamini kuwa uwezo wake uwanjani ni wa hali ya juu na ungetatua matatizo ya safu ya ulinzi ya United.

‘Nutter’ anayehitajika Old Trafford

Scholes anatambua kuwa Romero ana changamoto ya kinidhamu, lakini anaamini kuwa kocha Michael Carrick ana uwezo wa kumtuliza na kumfanya kuwa mhimili wa timu. Akizungumza kwenye podcast ya Midnite’s The Good, The Bad & The Football, Scholes alisema:

“Najua yeye ni mtukutu (nutter) na ana masuala ya kinidhamu, lakini anaweza kuwa beki wa kati mzuri sana ambaye Michael Carrick anaweza kumtuliza. Wanazungumzia dau la paundi milioni 30 au 40 kwa mchezaji ambaye amecheza fainali ya Kombe la Dunia. Nadhani wanamhitaji sana beki wa kati, wale waliopo sasa hawajatosheleza.”

Adam Wharton ndiye chaguo ‘perfect’

Kando na ulinzi, Scholes amemtaja kiungo wa Crystal Palace, Adam Wharton, kama mchezaji anayefaa kabisa kujiunga na kikosi cha Manchester United. Huku bei yake ikitajwa kufikia paundi milioni 85, Scholes anashangazwa na ukimya wa United katika kumsajili staa huyo ambaye amekuwa na kiwango bora kufuatia ushindi wa FA Cup na taji la Conference League na klabu yake.

“Siwezi kuamini kwamba hawajaribu kumsajili Adam Wharton. Sandro Tonali angekuwa chaguo langu la kwanza, lakini kwa vile ameenda kwingine, Adam Wharton anaonekana kuwa sahihi kabisa kwangu,” aliongeza Scholes.

Manchester United kwa sasa inaendelea na maandalizi ya msimu mpya, ikitarajiwa kuanza kampeni zao za Ligi Kuu ya Uingereza dhidi ya Hull City mnamo Agosti 22. Mashabiki wanatarajia kuona kama uongozi wa klabu utayafanyia kazi maoni hayo ya Scholes kabla ya dirisha la usajili kufungwa.