Paul Scholes atoa utabiri mzito kuhusu Mateus Fernandes kujiunga na Tottenham

Scholes hana imani na Fernandes

Gwiji wa Manchester United, Paul Scholes, ametoa utabiri usio na faraja kwa kiungo mpya wa Tottenham Hotspur, Mateus Fernandes. Scholes anaamini kuwa mchezaji huyo mwenye umri wa miaka 22 atashindwa kung’ara jijini London baada ya kuchagua kujiunga na ‘Spurs’ badala ya Manchester United.

Manchester United ilikuwa na nia ya dhati ya kumsajili Fernandes kutoka West Ham United katika dirisha la usajili lililopita, wakati ambapo klabu hiyo ilikuwa chini ya kocha Michael Carrick. Hata hivyo, mchezaji huyo wa kimataifa wa Ureno aliamua kutua Tottenham kwa ada ya pauni milioni 85.

Historia ya kushuka daraja

Katika maoni yake yaliyotolewa kupitia kipindi cha ‘The Good, The Bad and The Football’, Scholes alieleza kutokuwa na imani na uwezo wa mchezaji huyo kufanikiwa katika kiwango cha juu. Hoja yake kubwa inatokana na rekodi ya kiungo huyo kupata masaibu ya kushuka daraja mara mbili mfululizo.

“Nadhani nitaenda na upande wa kutofanikiwa (miss). Sijaona mengi kutoka kwake, hivyo nadhani nafanya ubashiri fulani. Sioni jina lake likitamba katika wiki za kwanza za msimu, na ukweli ni kwamba alishuka daraja katika miaka miwili iliyopita. Sisemi ni kosa lake, lakini alikuwa sehemu ya kikosi cha Southampton na West Ham. Kwa sababu hiyo, nasema atafeli,” alisema Scholes.

Maoni tofauti kutoka kwa Nicky Butt

Ingawa Scholes ana shaka na Fernandes, mwenzake wa zamani pale Old Trafford, Nicky Butt, ana mtazamo tofauti kuhusu uwezo wa kiungo huyo, ingawa bado ana shaka na chaguo la klabu aliyojiunga nayo.

“Nadhani yeye ni mchezaji mahiri sana. Ninaona ana kipaji kikubwa. Nilipomtazama akiichezea West Ham moja kwa moja, nilijisemea ‘Duh, huyu kijana ni mchezaji mzuri sana.’ Lakini kwa sasa, sioni kama klabu aliyopo ndiyo sehemu sahihi ya mchezaji kama yeye kwenda kucheza kwa sasa,” alisema Butt.

Kwa nini Fernandes alichagua Tottenham?

Kabla ya uhamisho huo kukamilika, Mateus Fernandes alieleza kuwa aliamua kujiunga na Tottenham kutokana na ushawishi mkubwa wa kocha Roberto De Zerbi. Alisisitiza kuwa uhusiano wake na kocha huyo ulikuwa muhimu zaidi kuliko mambo mengine.

Fernandes aliliambia The Athletic kuwa De Zerbi alimpigia simu kila siku na aliahidi kumtunza kama ‘baba wa pili’ nchini Uingereza, jambo lililomfanya ajihisi mwenye furaha na utulivu wa kisaikolojia. Sasa macho ya wadau wa soka yameelekezwa uwanjani kuona kama ‘ahadi’ za De Zerbi zitazaa matunda au kama utabiri wa Scholes utatimia.