Paul Scholes: Arsenal wasiwe kama Man United kwa Myles Lewis-Skelly

Uamuzi mgumu kwa Arsenal

Klabu ya Arsenal inajikuta katika kipindi kigumu cha maamuzi kuelekea mwisho wa dirisha la usajili. Wakati kocha Mikel Arteta akitafuta kuongeza nguvu katika maeneo ya ulinzi na ushambuliaji, imeripotiwa kuwa klabu hiyo inaweza kuachana na baadhi ya wachezaji ili kupata fedha za kufanyia usajili mpya. Miongoni mwa majina yanayotajwa kuondoka ni kinda Myles Lewis-Skelly.

Hata hivyo, kiungo mkongwe wa Manchester United, Paul Scholes, ametoa onyo kali kwa Arsenal. Kwa mtazamo wake, kumuuza kijana huyo ambaye ameonyesha uwezo mkubwa ni hatua ambayo huenda ikawagharimu baadaye.

Kosa la kihistoria la Man United

Scholes amekumbushia tukio la kuondoka kwa Danny Welbeck kutoka Manchester United miaka kadhaa iliyopita kama fundisho tosha. Kwa mujibu wa Scholes, kuona wachezaji chipukizi wanaotokea ndani ya mfumo wa klabu wakiuzwa ni kitu kinachoumiza hisia za mashabiki na wapenda soka.

“Inanikumbusha kidogo wakati Danny Welbeck alipoondoka Manchester United. Nilichukia kitendo hicho, sikukipenda kabisa. Ingawa Danny alikuwa mkubwa kidogo kuliko Myles Lewis-Skelly, lakini unapopoteza wachezaji wako mwenyewe, ni jambo la kuhuzunisha sana,” alisema Scholes kupitia The Overlap Fan Debate.

Scholes alisisitiza kuwa anathamini zaidi ubora wa Lewis-Skelly katika eneo la kiungo kuliko wachezaji wengine wanaotajwa sokoni, akionyesha imani kubwa kwa kijana huyo.

Carragher naye ameshtushwa

Sio Scholes pekee anayehoji uhalali wa Arsenal kutaka kumtoa Lewis-Skelly. Mchambuzi na nguli wa Liverpool, Jamie Carragher, naye ameshangazwa na taarifa hizo zinazoiweka Arsenal katika nafasi ya kutaka kumtoa mchezaji huyo.

Carragher anaamini kuwa uwezo wa Lewis-Skelly hauna shaka, akitolea mfano wa kiwango bora alichokionyesha katika viwanja vigumu kama ule wa Bernabeu na katika michezo mikubwa dhidi ya PSG.

“Siwezi kuamini. Unaweza kuona mchezaji huyu ana kiwango cha juu sana. Hujawahi kucheza katika kiwango kile kama huna kitu cha kipekee ndani yako ukiwa na umri ule. Sote tunajua wachezaji vijana huwa na nyakati ngumu na nyakati nzuri, lakini uwezo wake uko juu sana,” aliongeza Carragher.

Kwa sasa, macho yote yanaelekezwa kwa Arsenal kuona kama watasikiliza ushauri wa wakongwe hawa au wataendelea na mpango wao wa kufanya mabadiliko katika kikosi chao kwa kumuachia kinda huyo.