Pep Guardiola anatajwa kuwa na nia ya kuifundisha England

Mustakabali wa benchi la ufundi la timu ya taifa ya England umeanza kuzua gumzo kubwa, huku jina la aliyekuwa kocha wa Manchester City, Pep Guardiola, likitajwa sana kama mrithi mtarajiwa wa Thomas Tuchel.

Guardiola, ambaye ametangaza kuondoka Manchester City baada ya msimu huu kumalizika, anadaiwa kuwa yupo tayari kupokea changamoto mpya ikiwa nafasi hiyo ya kuifundisha ‘Three Lions’ itajitokeza. Taarifa hizi zinakuja wakati shinikizo likiwa kubwa kwa Tuchel kufuatia matokeo ya nusu fainali ya Kombe la Dunia dhidi ya Argentina.

Alikataa ofa ya Italia

Kabla ya kuhusishwa na England, ilifahamika kuwa Guardiola alikuwa akizungumziwa kuchukua mikoba ya kuinoa Italia baada ya timu hiyo kushindwa kufuzu Kombe la Dunia. Hata hivyo, mwandishi Ben Jacobs amethibitisha kuwa kocha huyo amekataa ofa hiyo kwa sababu za kifamilia zaidi kuliko masuala ya kifedha.

Sasa, nguvu zimehamia England ambapo ripoti zinaeleza kuwa mtaalamu huyo wa mbinu yupo tayari kuendeleza kazi ikiwa shirikisho la soka la nchi hiyo (FA) litaamua kumalizana na Tuchel.

Tuchel chini ya shinikizo

Ingawa Tuchel alifikisha timu hiyo hatua ya nusu fainali, mbinu zake kwenye mchezo dhidi ya Argentina zimeendelea kukosolewa vikali. Wataalamu mbalimbali wamemlalamikia kocha huyo kwa kitendo chake cha kuamua kucheza kwa tahadhari (defensive) baada ya kuongoza, jambo lililopelekea kupoteza mchezo kwa 2-1.

Danny Murphy, kiungo wa zamani wa Liverpool, amesema:

“[Tuchel] atabaki kwenye kazi yake, lakini sidhani kama anastahili. Amefeli. Wamekosa nafasi ya kuingia fainali ya Kombe la Dunia kwa sababu ya mbinu alizotumia. Watu wamevunjika moyo.”

Gary Neville pia aliongeza sauti yake akisema:

“Nina tatizo kubwa na maamuzi yake. Hakumuingiza Kobbie Mainoo, hakumuingiza Bukayo Saka, na amewaacha nyumbani wachezaji wenye vipaji vya hali ya juu kama Phil Foden na Cole Palmer. Ujumbe aliowapa wachezaji ulikuwa wa kujilinda badala ya kushambulia.”

Uamuzi wa Guardiola kuondoka Man City

Guardiola mwenyewe anaamini kuwa huu ndio wakati sahihi wa kuondoka Manchester City ili kutoa nafasi ya ‘nguvu mpya’.

“Miaka kumi ni muda mrefu sana na nadhani klabu inahitaji kocha mpya, nguvu mpya. Nahisi sitakuwa na nguvu zinazohitajika kila siku, kila baada ya siku tatu, kupambana kwa ajili ya ubingwa. Ni vizuri kubadilisha nyuso ili kila mmoja apate changamoto mpya,” alisema Guardiola wakati wa kutangaza uamuzi wake.

Kwa sasa, macho yote yako kwa FA kuona kama wataamua kuendelea na Tuchel au wataanza mchakato wa kumshawishi Guardiola kuja kuiongoza timu hiyo yenye wachezaji wengi wenye vipaji.