Florentino Perez aifungia milango Rodri kujiunga na Real Madrid

Perez hataki kumsajili Rodri

Matumaini ya mashabiki wa Real Madrid kumuona kiungo mahiri wa Manchester City, Rodri, akitua Santiago Bernabeu yamezimika baada ya ripoti kubainisha kuwa rais wa klabu hiyo, Florentino Perez, hana mpango huo.

Licha ya kuwepo kwa uvumi wa muda mrefu uliokuwa unamhusisha kiungo huyo wa kimataifa wa Hispania na miamba hiyo ya LaLiga, mchambuzi wa masuala ya usajili, Fabrizio Romano, ameweka wazi kuwa uhusiano wa kibiashara kati ya pande hizo mbili haupo kwenye hali ya kufanya kazi kwa sasa.

Akizungumza kupitia chaneli yake ya YouTube, Romano alisisitiza kuwa Perez hajavutiwa na wazo la kumsajili nyota huyo kutoka Etihad.

“Kwa upande wa Florentino Perez, hali ni ya baridi kabisa. Uelewa wangu ni kwamba Florentino hajaridhishwa na wazo la kumsajili Rodri kwa sasa. Hivyo, mambo ni shwari kabisa Real Madrid msimu huu wa joto,” alisema Romano.

Hatma ya Rodri Man City

Ingawa Rodri hatajiunga na Madrid msimu huu, mustakabali wake ndani ya Manchester City bado una maswali mengi. Mkataba wake unaendelea kuwa kitendawili, huku taarifa zikieleza kuwa pendekezo la mkataba mpya ambalo amepewa tangu mwezi Aprili bado halijasainiwa.

Romano aliongeza kuwa kuna uwezekano mkubwa wa kiungo huyo kubaki Manchester City msimu huu chini ya kocha Enzo Maresca, kabla ya kuamua hatua yake inayofuata mwaka 2027 ambapo mkataba wake utakuwa umemalizika, jambo linaloweza kumuwezesha kuondoka kama mchezaji huru.

Vipi kuhusu Erling Haaland?

Sio Rodri pekee aliyekuwa akihusishwa na Madrid, kwani mshambuliaji Erling Haaland naye amekuwa gumzo. Hata hivyo, Romano amesisitiza kuwa staa huyo wa Norway hataondoka Etihad wakati huu.

Baba mzazi wa mchezaji huyo, Alf-Inge Haaland, alipoulizwa kuhusu uwezekano wa mwanae kutua Madrid, alikiri kuwa kila mchezaji anatamani kucheza Real Madrid, lakini akasisitiza kuwa mwanae yuko furaha tele Manchester City.

Romano alihitimisha kwa kusema: “Haaland kwenda Real Madrid msimu huu ni hapana. Yeye ni mchezaji muhimu katika mradi wa City na kocha wao mpya, Enzo Maresca, na hali ni nzuri sana kati yake na klabu.”