Real Madrid watoa tamko zito kuhusu ofa ya Liverpool kwa Endrick

Real Madrid wagoma kumuuza Endrick

Klabu ya Liverpool imeonyesha nia ya dhati ya kuimarisha safu yake ya ushambuliaji katika siku hizi za mwisho za dirisha la usajili, ambapo taarifa mpya zikithibitisha kuwa walipiga simu Real Madrid ili kufahamu uwezekano wa kumsajili mshambuliaji wao kijana, Endrick.

Hata hivyo, Liverpool hawajafanikiwa kupata walichotaka. Kulingana na mtaalamu wa masuala ya usajili, Fabrizio Romano, mabingwa hao wa Hispania wamefunga milango yote kuhusu kuondoka kwa kinda huyo wa Kibrazili, wakisisitiza kuwa anahitajika kikosini kwa ajili ya changamoto za msimu huu.

Msimamo wa Real Madrid

Romano amefafanua kuwa Liverpool walitaka kufahamu kama kuna nafasi ya kumsajili Endrick kwa mkopo wenye kipengele cha kumnunua au hata usajili wa moja kwa moja kwa dau kubwa. Lakini jibu kutoka Santiago Bernabeu lilikuwa ni la kukata tamaa kwa klabu hiyo ya Uingereza.

“Hadithi kuhusu Endrick katika siku hizi mbili au tatu zilizopita ni ya kweli. Klabu za Italia kama Roma na AC Milan ziliwasiliana na mawakala wake, vilevile Aston Villa walipiga simu wiki mbili zilizopita, lakini jibu kutoka Real Madrid lilikuwa ni ‘hakuna nafasi’, milango yote imefungwa,” alisema Romano kupitia chaneli yake ya YouTube.

Aliongeza kuwa rais wa klabu hiyo, Florentino Perez, na kocha Jose Mourinho wameamua kuwa kijana huyo anabaki klabuni hapo na anatarajiwa kuvaa jezi namba tisa. Real Madrid wana imani kubwa na uwezo wa mshambuliaji huyo na hawataki kumuachia kwa sasa.

Nini kinafuata kwa Liverpool?

Liverpool, chini ya kocha Andoni Iraola, kwa sasa wanakabiliwa na changamoto kwenye safu ya ushambuliaji kwani Alexander Isak ndiye mshambuliaji pekee anayewategemea, kutokana na Hugo Ekitike kuwa nje ya uwanja hadi mwaka ujao kufuatia jeraha la mguu.

Ingawa mlango wa Endrick umefungwa kwa sasa, hali inaweza kubadilika huko mbeleni. Romano amedokeza kuwa ikiwa kufikia mwezi Desemba Endrick hatakuwa akipata nafasi ya kucheza mara kwa mara kwenye kikosi cha kwanza, basi Real Madrid wanaweza kufikiria upya uamuzi wao, kama ilivyokuwa alipokuwa kwa mkopo Lyon msimu uliopita.

Kwa sasa, Endrick anaendelea na mazoezi akiwa amejipanga kupambania nafasi yake ndani ya klabu hiyo ya Madrid, huku Liverpool wakiendelea na jitihada zao za kutafuta wachezaji wengine wa pembeni ili kuongeza nguvu kuelekea msimu mpya wa ligi.