Real Madrid yaanza rasmi mchakato wa kumsajili Rodri kutoka Man City

Real Madrid yafungua milango kwa Rodri

Mabingwa wa Ulaya, Real Madrid, wameanza rasmi jitihada za kumnasa kiungo tegemeo wa Manchester City, Rodri. Kwa mujibu wa mtaalamu wa masuala ya usajili barani Ulaya, Fabrizio Romano, klabu hiyo ya jijini Madrid imewasiliana na Manchester City kwa mara ya kwanza ili kuanza mazungumzo ya dili hilo.

Florentino Perez, rais wa Real Madrid, anatajwa kutoa baraka zake kwa dili hilo baada ya milango kufungwa kwa miezi kadhaa iliyopita. Ripoti zinaeleza kuwa Real Madrid wameonyesha utayari wa kutoa kiasi kinachozidi Euro milioni 50 ili kufanikisha usajili wa kiungo huyo raia wa Hispania.

Hali ya mkataba wa Rodri

Rodri, mwenye umri wa miaka 30, bado ana mkataba na Manchester City hadi Juni 2027. Ingawa City wamekuwa wakitamani kumwongezea mkataba mpya, inaonekana kiungo huyo yuko tayari kufanya maamuzi mapya ya kuelekea Santiago Bernabeu.

Kama ilivyoripotiwa na Mario Cortegana wa The Athletic, Rodri hana kipingamizi kuhusu maslahi binafsi ya mkataba, na hamu yake kubwa ni kurejea nchini Hispania kuitumikia Real Madrid. Klabu ya Manchester City kwa upande wao, haijafunga mlango wa kuuza ikiwa makubaliano hayatafikiwa, japo wanatumai bado wanaweza kumbakiza.

Savinho naye ataka kuondoka

Wakati sakata la Rodri likiendelea, Manchester City pia wanakabiliwa na changamoto ya mshambuliaji wao, Savinho. Mchezaji huyo raia wa Brazil ameiambia klabu yake kuwa anatamani kuondoka msimu huu ili kupata nafasi zaidi ya kucheza na kukuza kiwango chake.

“Savinho ameiambia Manchester City kuhusu nia yake ya KUONDOKA msimu huu ili kupata nafasi zaidi ya kucheza,” Fabrizio Romano alithibitisha.

Klabu ya Tottenham Hotspur imetajwa kuwa mstari wa mbele katika kumuwania winga huyo, huku mazungumzo kati ya klabu hizo mbili yakitajwa kuendelea tangu mwanzoni mwa dirisha la usajili. Inasemekana kuwa iwapo Savinho ataondoka, Manchester City wataingia sokoni kusaka mshambuliaji mwingine ili kuziba nafasi yake.

Soko la usajili linaendelea kuwa na joto kubwa kwa Manchester City, huku wakipambana kusuka upya kikosi chao baada ya kuondoka kwa wachezaji kama Bernardo Silva na Nathan Ake msimu uliopita.