Real Madrid yamuwekea Liverpool mtego kwa Yan Diomande

Real Madrid yavamia dili la Diomande

Klabu ya Liverpool inajikuta katika wakati mgumu katika harakati zao za kumsajili winga wa RB Leipzig, Yan Diomande. Wakati ikiaminika kuwa Liverpool tayari imefikia makubaliano binafsi na mchezaji huyo wa kimataifa wa Ivory Coast, sasa Real Madrid imeibuka na nia ya kumnyakua staa huyo chipukizi.

Ripoti kutoka Hispania zinaeleza kuwa kocha wa Real Madrid, Jose Mourinho, anamhitaji Diomande kama mbadala wa muda mrefu wa Vinicius Junior. Mourinho anaamini kuwa winga huyo ana uwezo wa kuimarisha safu yao ya ushambuliaji kwa miaka mingi ijayo, licha ya changamoto ya bei yake ambayo inatajwa kufikia zaidi ya Euro milioni 120.

Changamoto za RB Leipzig

Kwa upande wao, RB Leipzig wameonekana kutokuwa tayari kumuachia mchezaji huyo kwa sasa. Mtaalamu wa masuala ya usajili, Fabrizio Romano, amebainisha kuwa klabu hiyo ya Ujerumani inajaribu kumshawishi Diomande abaki kwa angalau msimu mwingine mmoja.

“Wanaendelea kumwambia Diomande na mawakala wake: baki msimu mwingine hapa RB Leipzig, saini mkataba mpya, pata mshahara mzuri, na weka kipengele cha kuondoka (release clause), ili msimu wa 2027 uweze kwenda popote unapotaka,” alisema Romano.

Licha ya Leipzig kutaka kumbakiza, inafahamika kuwa mchezaji mwenyewe anashawishika kuondoka mara moja ili kuanza changamoto mpya, licha ya timu hiyo kushiriki michuano ya Ligi ya Mabingwa Ulaya msimu ujao.

Liverpool yaandaa “Plan B”

Kutokana na ugumu unaojitokeza katika dili la Diomande, Liverpool haitaki kupoteza muda. Taarifa kutoka Ujerumani zinasema kuwa klabu hiyo ya Merseyside imeanza kumtazama Said El Mala, winga chipukizi anayekipiga Cologne, kama mbadala iwapo dili la Diomande litashindikana.

Liverpool haiko peke yake katika kumsaka El Mala, kwani Tottenham na Newcastle United pia zimeonyesha nia ya kumsajili kinda huyo. Inaripotiwa kuwa Cologne wanahitaji kiasi cha Euro milioni 50 ili kuanza mazungumzo rasmi ya kumuuza mchezaji huyo.

Hali hii inaonyesha wazi kuwa Liverpool iko makini katika kukiboresha kikosi chao cha ushambuliaji, hususan baada ya Mohamed Salah kuonyesha nia ya kuondoka klabuni hapo na kiwango cha Cody Gakpo kutokuwa cha kuridhisha msimu uliopita.