Richarlison aomba FIFA kuvunja mkataba wake na Tottenham

Mvutano wa Richarlison na Spurs wafikia pabaya

Mshambuliaji wa Brazil, Richarlison, ameamua kuchukua hatua kali ya kisheria kwa kuiomba Shirikisho la Soka Duniani (FIFA) kumuondolea mkataba wake na klabu ya Tottenham Hotspur. Hatua hii imekuja baada ya mchezaji huyo kuenguliwa rasmi kwenye kikosi cha wachezaji 25 waliosajiliwa kucheza Ligi Kuu ya Uingereza (Premier League) msimu huu.

Sio hivyo tu, taarifa zinaeleza kuwa nyota huyo mwenye umri wa miaka 29 kwa sasa anafanya mazoezi na kikosi cha vijana (Under-21) cha klabu hiyo, hali inayozidi kuonyesha kuwa hana nafasi tena katika mipango ya benchi la ufundi la Spurs.

Kauli ya kocha Roberto De Zerbi

Kocha wa Tottenham, Roberto De Zerbi, ameweka wazi kuwa uamuzi wa kumuondoa Richarlison haukuwa wake binafsi, bali ni matokeo ya mchezaji mwenyewe kuonyesha nia ya kutaka kuondoka tangu kuanza kwa msimu.

“Haikuwa uamuzi wangu. Ni uamuzi wa kawaida. Nadhani Richarlison aliamua kila kitu mwenyewe. Alizungumza nami mwanzoni mwa maandalizi ya msimu (pre-season). Alinieleza nia yake na hamu yake ya kutaka kuondoka,” alisema De Zerbi.

Kocha huyo aliongeza kuwa anataka kubaki na wachezaji ambao wana hamasa na nia ya dhati ya kuichezea klabu hiyo, na kwa sasa suala la hatima ya Richarlison lipo mikononi mwa uongozi wa klabu.

Jaribio la kurejea Brazil

Richarlison alihusishwa sana na mpango wa kurejea klabu yake ya zamani, Everton, wakati wa dirisha la usajili lililopita, lakini mazungumzo hayakufanikiwa. Hivi karibuni, klabu ya Vasco da Gama ya nchini Brazil ilionyesha nia ya kumsajili mshambuliaji huyo, na inasemekana pande hizo mbili zilishafikia makubaliano ya masharti binafsi.

Hata hivyo, kuna changamoto kubwa ya kikanuni. Tottenham haiwezi kumtoa Richarlison kwa mkopo wa kimataifa kwa sababu tayari imefikisha kikomo cha wachezaji walioruhusiwa kutolewa kwa mkopo kwa mujibu wa kanuni za FIFA. Hii inajumuisha wachezaji kama Guglielmo Vicario na Radu Dragusin waliopo kwenye klabu nyingine.

Anatafuta njia ya kipekee

Kulingana na mwandishi wa habari za michezo wa Brazil, Raisa Simplico, Richarlison ameamua kuwasilisha ombi rasmi kwa FIFA ili kuvunja mkataba wake (unilateral termination). Hii ni hatua inayofanana na ile iliyowahi kutumiwa na Renan Lodi alipoondoka Al Hilal kujiunga na Atlético-MG.

Kwa sasa, ulimwengu wa soka unasubiri kuona ni maamuzi yapi yatatolewa na FIFA, huku muda ukizidi kuyoyoma kwani dirisha la usajili nchini Brazil linatarajiwa kufungwa Ijumaa hii.