Rio Ferdinand aonya Manchester United kuhusu sakata la JJ Gabriel

Kinda mwenye kipaji cha ajabu

Beki wa zamani wa Manchester United, Rio Ferdinand, amekiri wazi kuwa kinda JJ Gabriel ni mchezaji mwenye kipaji cha hali ya juu. Ferdinand, ambaye amepata fursa ya kumuona kijana huyo akifanya mazoezi na kikosi cha kwanza cha klabu hiyo, amesema kuwa uwezo wa kinda huyo ni wa kipekee na anaamini ana mustakabali mzuri sana kwenye soka la ushindani.

Akizungumza kwenye chaneli yake ya YouTube, Ferdinand alisema:

“Kwanza kabisa, huyu mtoto ana kipaji cha ajabu. Ni kitu cha kusisimua. Sijui ukomo wa uwezo wake utakuwa wapi. Nimemuona akicheza, nimemuona akifanya mazoezi na nimewasikiliza watu waliomfundisha kwa miaka kadhaa, hakuna shaka kuwa mtoto huyu atafika kileleni.”

Kwa nini anataka kuondoka?

Ripoti zinaeleza kuwa familia ya Gabriel imewataarifu Manchester United kuhusu nia ya kinda huyo mwenye umri wa miaka 15 kuondoka klabuni hapo. Inadaiwa kuwa kuna hali ya kutoridhika kwa upande wa kijana huyo na familia yake kwa sababu kinda huyo hajapata nafasi ya kucheza mechi ya ushindani, licha ya kufanya mazoezi na timu ya wakubwa na kupata uzoefu chini ya Michael Carrick wakati wa msimu wa maandalizi.

Ferdinand anaamini kuwa uamuzi huo huenda ukaongozwa na familia zaidi kuliko mtoto mwenyewe, akiongeza kuwa wakati mwingine matarajio ya haraka yanaweza kuwa chanzo cha mgogoro huu.

“Ninakumbuka nikimuona akifanya mazoezi ya kupiga mashuti na Bruno Fernandes. Huyo ndiye mchezaji bora wa mwaka wa PFA na mmoja wa viungo bora duniani. Kwa kijana wa miaka 15, hilo lingetosha kwangu. Lakini labda ana matamanio makubwa na anataka kucheza tayari,” aliongeza Ferdinand.

Manchester United haipaswi kulegeza kamba

Licha ya kipaji kikubwa cha Gabriel, Ferdinand amewashauri viongozi wa Manchester United kutokubali kuburuzwa na matakwa ya kinda huyo na familia yake. Anasisitiza kuwa klabu kubwa kama United inapaswa kuonyesha mamlaka na kutoyumba katika misimamo yake.

“Manchester United haiwezi kuonekana kama inaburuzwa na kijana wa miaka 15, haijalishi ni mzuri kiasi gani. Kwa hiyo, vyovyote matokeo yatakavyokuwa, Manchester United inabidi ibaki imara katika hili,” alisisitiza beki huyo wa zamani.

Ferdinand anaonya kuwa klabu lazima ijali maslahi yake ya muda mrefu kwani tabia ya kuruhusu wachezaji wachanga kulazimisha kuondoka inaweza kuleta athari mbaya kwa wachezaji wengine wanaokuja kwenye akademia ya klabu hiyo.