Robbie Fowler amshauri Klopp kumsajili Christian Pulisic kuziba nafasi ya Salah

Fowler anamtaka Pulisic Anfield

Gwiji wa klabu ya Liverpool, Robbie Fowler, ametoa maoni yake kuhusu nani anapaswa kuziba pengo la staa Mohamed Salah ambaye amethibitisha kuondoka Liverpool mwishoni mwa msimu huu.

Fowler anaamini kuwa mshambuliaji wa zamani wa Chelsea, Christian Pulisic, ndiye mtu sahihi wa kuja kuleta mabadiliko ndani ya kikosi cha Liverpool kutokana na uzoefu wake kwenye Ligi Kuu ya Uingereza na kiwango bora anachokionyesha sasa katika michuano ya Kombe la Dunia akiwa na timu ya taifa ya Marekani.

Kupitia mtandao wa X, Fowler aliandika: > “Kuna tetesi nyingi kuhusu nani anakuja Liverpool. Jina moja ambalo sijaliona likitajwa ni Pulisic. Ana umri mzuri, ameshatamba kwenye Ligi Kuu, ni mchezaji mwenye uwezo wa kusisimua. Mimi ningemsajili, anaweza kufuata njia aliyoipita Salah, mnaonaje?”

Liverpool inavyokabiliana na changamoto za sokoni

Liverpool ilikuwa imepanga kumsajili winga wa RB Leipzig, Yan Diomande, kama lengo kuu la kuimarisha safu yake ya ushambuliaji. Hata hivyo, dili hilo linaonekana kusuasua baada ya ofa yao ya takriban Euro milioni 100 kukataliwa na klabu hiyo ya Ujerumani.

Ripoti kutoka kwa waandishi kama David Ornstein na Ben Jacobs zinaeleza kuwa Diomande anaonekana kuvutiwa zaidi na kujiunga na Paris Saint-Germain (PSG) ili kufanya kazi chini ya kocha Luis Enrique. Hali hii imeifanya Liverpool kulazimika kutathmini upya vipaumbele vyake.

Chaguzi nyingine mezani

Ingawa tayari Liverpool imefanikiwa kumsajili Victor Munoz kutoka Osasuna, klabu hiyo bado inahitaji mshambuliaji mwingine mwenye ubora wa juu. Mbali na Pulisic, kuna majina mengine yanayohusishwa na klabu hiyo ya Anfield, ikiwemo Bradley Barcola wa PSG, pamoja na wachezaji Said El Mala, Matias Fernandez-Pardo, na Yankuba Minteh.

Kwa sasa, Liverpool bado inatafakari hatua za kuchukua huku dirisha la usajili likiwa wazi na shinikizo la kupata mrithi wa Salah likizidi kuongezeka kwa mashabiki wa klabu hiyo.