Barcelona yafikia makubaliano na Rodri, Man City yajipanga kumsaka mrithi

Hatua muhimu ya Rodri kuelekea Camp Nou

Mustakabali wa kiungo fundi wa Manchester City, Rodri, unaonekana kuwa mwisho jijini Manchester baada ya ripoti kuthibitisha kuwa mchezaji huyo amefikia makubaliano binafsi ya kujiunga na Barcelona. Mshindi huyu wa Ballon d’Or anaingia mwaka wake wa mwisho wa mkataba, hali inayoongeza presha kwa mabingwa hao wa England kufanya maamuzi haraka.

Awali, kulikuwa na tetesi nyingi zilizomhusisha nyota huyo na Real Madrid, hata hivyo, hali imebadilika baada ya Barcelona kuingilia kati na kuonyesha nia ya dhati ya kumsajili. Wakala wa mchezaji huyo, Pablo Barquero, amethibitisha kuwa mteja wake ameamua njia yake ya baadae.

“Kwa heshima kwa Real Madrid, kwa sababu walikuwa na taaluma ya hali ya juu, Rodri aliwataarifu kuwa uamuzi wake ni kujiunga na Barcelona,” alisema Barquero.

Mazungumzo ya ada ya uhamisho yanaendelea

Mchambuzi wa masuala ya usajili, Fabrizio Romano, amebainisha kuwa tayari kuna makubaliano kamili kati ya Rodri na Barcelona kuhusu maslahi binafsi. Hata hivyo, klabu hizo mbili bado zinatofautiana kwenye dau la uhamisho. Barcelona inaonekana kuwa tayari kutoa kiasi kinachozidi Euro milioni 45, wakati Manchester City inashikilia msimamo wa kutaka ada ya juu zaidi.

Licha ya tofauti hizo za kibiashara, Barcelona wana imani kubwa kuwa dili hilo litakamilika hivi karibuni kutokana na mchezaji mwenyewe kuonyesha nia ya wazi ya kuondoka na kuelekea Catalonia.

Man City wajipanga na mbadala

Wakati sakata la Rodri likiendelea, Manchester City hawajakaa kimya. Klabu hiyo inafahamu vyema hitaji la kuziba pengo la kiungo huyo pindi atakapoondoka, huku jina la Ayyoud Bouaddi wa Lille likitajwa kama moja ya malengo yao makuu.

Katika upande mwingine wa usajili, Manchester City wapo kwenye hatua za mwisho za kumsajili kipa wa Marseille, Geronimo Rulli. Inatarajiwa kuwa kipa huyo atachukua nafasi ya James Trafford ambaye anatarajiwa kujiunga na Leeds United. Ripoti zinaeleza kuwa Rulli tayari amekubaliana na mkataba wa miaka minne utakaomfanya awepo Etihad hadi mwaka 2028.