Fabrizio Romano afunguka kuhusu mpango wa Man Utd kumsajili Tchouameni au Camavinga

Man Utd wanatafuta kiungo mpya

Manchester United wanaendelea na mipango yao ya kuimarisha safu ya kiungo baada ya kufanikiwa kuwanasa Andrey Santos na Youri Tielemans. Lengo kuu la klabu hiyo ya Old Trafford sasa ni kumpata kiungo mkabaji ambaye anaweza kuchukua nafasi ya Casemiro kwa muda mrefu.

Katika harakati hizo, majina ya mastaa wa Real Madrid, Aurelien Tchouameni na Eduardo Camavinga, yamekuwa yakitajwa mara kwa mara kuhusishwa na mpango wa kutua England. Hata hivyo, mtaalamu wa masuala ya usajili, Fabrizio Romano, ameweka wazi ukweli kuhusu uwezekano wa dili hizo kutimia.

Hali halisi ya Tchouameni

Ingawa kumekuwa na ripoti zinazodai United wameulizia uwezekano wa kumsajili Tchouameni, Romano amewakata maini mashabiki wa Mashetani Wekundu. Kwa mujibu wa mwandishi huyo, kiungo huyo tayari ameshajifunga na Real Madrid.

“Tchouameni anatazamwa ndani ya Manchester United kama kiungo wa ndoto, kiungo mkamilifu. Katika suala la uongozi na ubora wa hali ya juu, yeye ndiye mrithi sahihi wa Casemiro. Lakini uelewa wangu ni kwamba tayari ameshasaini mkataba mpya na Real Madrid, kila kitu kimekwisha. Yeye ni mchezaji muhimu sana kwa Jose Mourinho na walikuwa wakipambana kumbakisha,” alisema Romano.

Camavinga naye anataka kubaki

Kuhusu Eduardo Camavinga, Romano amesema kuwa ingawa United wamekuwa na mazungumzo na mawakala wake, mchezaji mwenyewe hana mpango wa kuondoka Santiago Bernabeu kwa sasa.

“Manchester United walizungumza na mawakala wa Eduardo Camavinga ili kuelewa hali ya mchezaji. Lakini kwa sasa, ujumbe unaotoka kwa Camavinga ni kwamba anataka kufanya kazi chini ya Jose Mourinho na kujaribu kufufua kiwango chake akiwa Real Madrid,” aliongeza Romano.

Romano alihitimisha kwa kusema kwamba ikiwa mambo yatabadilika huko mbeleni na Camavinga akaamua kuondoka, basi Ligi Kuu ya England (Premier League) itakuwa ndiyo sehemu inayopewa nafasi kubwa zaidi ya kumvutia nyota huyo. Kwa sasa, matamanio ya mchezaji huyo ni kusalia ndani ya jiji la Madrid.

Nani mbadala?

Wakati milango ya Tchouameni na Camavinga ikionekana kufungwa, ripoti zinaonyesha kuwa Manchester United wameelekeza nguvu zao kwa kiungo wa AS Roma, Manu Kone. Mchezaji huyo anatazamwa kama chaguo la kweli zaidi, huku United wakiripotiwa kuandaa ofa ya takriban pauni milioni 51 ili kukamilisha usajili wake.