Rosenior ajibu kejeli za Chelsea: “Mimi si mzaha”

Rosenior azungumzia kipindi kigumu Chelsea

Liam Rosenior amesema haoni kuwa ni mtu wa mzaha, akijibu namna alivyotaniwa na kukosolewa wakati akiwa kocha wa Chelsea. Kocha huyo, ambaye sasa anaiongoza Paris FC, amezungumza kuhusu kwa mara ya kwanza kwa kina kuhusu uzoefu wake Stamford Bridge na namna vyombo vya habari vilivyojenga taswira yake.

Rosenior aliondolewa Chelsea baada ya siku 106 tu akiwa kazini. Kuondoka kwake kulifuatia timu kupoteza mechi tano mfululizo bila kufunga bao. Hata hivyo, maoni yake kuhusu kilichotokea yameibua maswali zaidi kuliko majibu ya moja kwa moja.

Katika mahojiano na jarida la So Foot, alisema alifurahia baadhi ya mambo aliyopitia, licha ya kipindi hicho kuwa kifupi na kigumu.

“Ulikuwa uzoefu bora zaidi maishani mwangu, na pia mgumu zaidi. Ulikuwa wa kuvutia, ingawa ulidumu miezi minne tu. Sitaki kuingia kwenye maelezo kwa sasa. Nitazungumza siku moja, wakati utakapofaa.”

Alipoulizwa kuhusu kauli yake kwamba yaliyotokea Chelsea “hayahusiani na soka”, Rosenior alitaja suala la uvumilivu na jinsi watu wanavyotarajia kocha wa Premier League aonekane na kujiendesha. Hata hivyo, hakutoa ufafanuzi wa moja kwa moja kuhusu sababu za kuondolewa kwake.

Kejeli kuhusu mtindo wake wa uongozi

Wakati akiwa Chelsea, Rosenior alipewa jina la utani “LinkedIn Liam” kutokana na namna alivyowasilisha ujumbe wake, mara nyingi kwa mtindo uliofananishwa na semina za kujiboresha. Baadhi ya kauli zake na taratibu alizotumia zililinganishwa na David Brent, mhusika wa meneja wa ofisi katika kipindi cha vichekesho cha BBC The Office.

Miongoni mwa kauli zilizozua mjadala ni wito wake wa kutaka klabu “isizuie yasiyowezekana”, pamoja na kuwaambia wachezaji “kuheshimu mpira” wakiwa wamekusanyika katikati ya uwanja kabla ya mchezo. Kauli nyingine kuhusu maana ya kusimamia wachezaji nayo iligeuka kuwa mada ya kejeli.

Rosenior amesema hata maelekezo aliyompa Alejandro Garnacho kwenye karatasi ndogo yalidhihakiwa. Tukio hilo lilitokea Chelsea ilipokuwa pungufu kwa mchezaji mmoja dhidi ya Paris Saint-Germain, katika mchezo wa marudiano mwezi Machi. Chelsea ilipoteza kwa jumla ya mabao 8-2.

“Nguo nilizovaa zikawa mzaha, na namna nilivyozungumza pia. Mimi si mzaha!”

Kocha huyo alisema hawezi kuamua namna vyombo vya habari vinavyomwelezea. Kwa maoni yake, simulizi lililojengeka kuhusu tabia yake lilifanya watu wamuhukumu kwa mtazamo huo, badala ya kuangalia kazi yake ya ukocha pekee.

Asema maoni ya umma yanaweza kuathiri taswira

Rosenior pia alisema kuna matarajio fulani kuhusu jinsi kocha wa Premier League anavyopaswa kuonekana na kujiendesha. Anadai kuwa yeye hujaribu kuwa mkweli na halisi, lakini hawezi kudhibiti namna wengine wanavyomfafanua.

“Watu wanaonifahamu wanajua kwamba ninajaribu kuwa mkweli na halisi. Lakini sina uwezo wa kudhibiti namna vyombo vya habari vinavyonielezea.”

Aliongeza kuwa vyombo vya habari na mitandao ya kijamii vina uwezo wa kuathiri maoni ya watu kuhusu ubora wa mchezaji au kocha, na hata kujenga simulizi nzima kuhusu mwelekeo wa klabu.

Rosenior alisema atazungumza zaidi kuhusu yaliyotokea Chelsea siku moja, lakini kwa sasa ameamua kutofichua maelezo. Kwa hiyo, kauli yake ya kwamba aliondolewa kwa sababu zisizohusiana na soka imebaki kuwa fumbo, huku akisisitiza kuwa taswira iliyojengwa juu yake haimwakilishi kikamilifu.