Roy Keane atilia shaka uwezo wa England kutwaa Kombe la Dunia

Utabiri wa Keane kuhusu England

Hakati za kuelekea hatua ya mtoano ya Kombe la Dunia zikiwa zimeshika kasi, mkongwe wa Manchester United, Roy Keane, ameweka wazi wasiwasi wake kuhusu uwezo wa timu ya taifa ya England kufika fainali na kunyanyua kombe hilo. England, chini ya kocha Thomas Tuchel, wametinga hatua ya 32 bora baada ya kumaliza vinara wa Kundi L wakiwa na pointi saba.

England wanatarajiwa kushuka dimbani siku ya Jumatano kumenyana na DR Congo katika mchezo wa hatua ya mtoano. Hata hivyo, Keane anaamini kuwa njia ya England kuelekea fainali ni ngumu sana, ikizingatiwa kuwa wanaweza kukutana na majina makubwa kama Brazil na Argentina.

Hakuna nafasi mbele ya Argentina

Wakati akizungumza katika kipindi cha Stick to Football, Keane hakuwa na shaka kuelezea kutokuwa na imani na kikosi hicho cha ‘Three Lions’ pindi kitakapokutana na changamoto kubwa, hususan kutoka kwa Argentina.

“England haitakuwa na nafasi yoyote ya kuifunga Argentina katika hatua ya nusu fainali. Sioni kama hilo linawezekana,” alisema Keane kwa msisitizo.

Maoni ya Keane yanaungwa mkono na staa mwingine wa zamani wa England, Ian Wright. Ingawa Wright anaamini England wanaweza kuitoa Brazil katika hatua ya robo fainali, naye anaona ugumu mkubwa pindi watakapotinga hatua ya nusu fainali.

Matumaini ya mashabiki na ubora wa Bellingham

Kinyume na mtazamo wa Keane, Jill Scott anaonekana kuwa na matumaini makubwa zaidi. Scott anaamini England itazidi kuimarika kadiri mashindano yanavyoendelea na anaona kikosi hicho kinaweza kufika fainali.

“Nadhani tutafika fainali. Nadhani tutapata kasi zaidi kadiri tunavyosonga mbele. Katika hatua hii, huwezi kuchagua wapinzani, unacheza kulingana na nani yuko mbele yako. Naamini tutafikia kiwango kingine cha juu wakati tutakapokutana na wapinzani wagumu zaidi,” alisema Scott.

Licha ya ukosoaji wake, Keane hakusita kumsifia kiungo Jude Bellingham, ambaye anamuona kama mtu muhimu anayeweza kuibeba timu hiyo mgongoni mwake.

“Jude Bellingham amefanya kazi kubwa katika kipindi cha pili kwa ubora wake akiwa na mpira. Tunajua sehemu muhimu ya soka ni kile unachokifanya unapokuwa na mpira. Ameweza kudumisha kasi ya kuwainua wachezaji wenzake na hata kocha,” aliongeza Keane.

England ilianza mashindano haya kwa kishindo baada ya ushindi wa 4-2 dhidi ya Croatia, lakini kiwango chao katika michezo dhidi ya Ghana na Panama kimeacha maswali mengi. Sasa macho yote yapo kwenye mchezo dhidi ya DR Congo, ambapo dunia itashuhudia kama vijana wa Tuchel wanaweza kuthibitisha ubora wao au kama hofu za Keane zina msingi.