Ryan Giggs amtaja JJ Gabriel kuwa mrithi wa Wayne Rooney ndani ya Man Utd

Kipaji cha kipekee kinachochipukia

Manchester United inaonekana kuwa na lulu nyingine ya kipekee katika akademi yao. Kinda JJ Gabriel, mwenye umri wa miaka 15 pekee, ameanza kuteka hisia za mastaa wakubwa wa klabu hiyo, ikiwemo gwiji Ryan Giggs ambaye amemfananisha kijana huyo na mkongwe Wayne Rooney.

Gabriel aliweka historia hivi karibuni alipocheza mechi yake ya kwanza katika kikosi cha wakubwa cha United dhidi ya Atletico Madrid kwenye mchezo wa kirafiki kule Stockholm. Ingawa mechi hiyo ilikuwa ya kirafiki, hatua hiyo ilimfanya kuwa mchezaji kijana zaidi kuwahi kuvaa jezi ya kikosi cha kwanza cha “Mashetani Wekundu” hao.

Ufanano na Rooney

Akizungumza kwenye kipindi cha Rio Ferdinand Presents, Ryan Giggs alionesha kuvutiwa sana na ujasiri wa kijana huyo anapokuwa uwanjani akifanya mazoezi na wakubwa. Giggs alimfananisha Gabriel na Rooney kutokana na njaa yake ya kutaka mpira muda wote.

“Hiyo inasikika kama Wayne, sivyo? Ni kama anasema, ‘nipe mpira, nipe mpira’. Sijali ninafanya mazoezi na nani,” alisema Giggs akielezea ujasiri wa kinda huyo.

Changamoto ya maendeleo

Licha ya kuwa na kipaji kikubwa, swali kubwa ni kuhusu hatua ya kijana huyo katika kukuza kiwango chake. Kuna mijadala ikiwa anapaswa kutolewa kwa mkopo ili apate dakika nyingi za kucheza au abaki ndani ya klabu ili azoee mazingira ya Old Trafford.

Kwa mtazamo wa Giggs, Gabriel ni mchezaji mwenye kipaji cha aina yake ambacho kimezaliwa mara moja katika vizazi kadhaa (generational talent), na anapaswa kubaki klabuni hapo chini ya uangalizi wa makocha kama Michael Carrick.

“Nadhani anapaswa kubaki. Hakuna haja ya kwenda kwa mkopo kwa sababu yupo mahali sahihi. Uzoefu wa kuwa na timu, kusafiri nao na kuona shinikizo la kuchezea Manchester United ni vitu vya thamani sana,” aliongeza Giggs.

Subira ni muhimu

Giggs pia alisisitiza umuhimu wa subira kwa kijana huyo. Ingawa Gabriel anaweza kuhisi yupo tayari kucheza kila wiki, ni muhimu kwa benchi la ufundi chini ya Michael Carrick kumuongoza taratibu ili asipoteze muelekeo.

“Kuna wakati unafika ambapo huwezi kumuacha nje, lakini wakati mwingine unahitaji kuelewa kuwa kukaa benchi au kupata dakika chache kunaweza kusaidia kumuandaa vyema kwa siku za usoni,” alihitimisha staa huyo wa zamani wa United.