Sababu za Thomas Tuchel kumweka benchi Kobbie Mainoo kwenye Kombe la Dunia zafahamika

Sababu za Tuchel kumweka benchi Mainoo zafahamika

Kutotumiwa kwa kiungo wa Manchester United, Kobbie Mainoo, katika michuano ya Kombe la Dunia kumezua mjadala mkubwa miongoni mwa mashabiki wa England. Licha ya kuonyesha kiwango bora kilichoiwezesha United kufuzu Ligi ya Mabingwa msimu wa 2025/26, kijana huyo hakupewa nafasi hata ya dakika moja na kocha Thomas Tuchel.

Ripoti kutoka vyombo vya habari nchini Uingereza, zikiwemo The Daily Mail na The Athletic, zimefichua kuwa maamuzi ya Tuchel yalitokana na kile alichokiona mazoezini pamoja na hali ya kimtazamo ya mchezaji huyo kambini.

Uamuzi mgumu wa Tuchel

Awali, ilionekana kama Mainoo angepata nafasi, hususan wakati Declan Rice alipokuwa akisumbuliwa na majeraha. Hata hivyo, mambo yalikwenda tofauti.

“Katika wiki iliyotangulia mechi ya pili, wakati Rice akianza kupata shida, Mainoo alicheza kiungo wa kati mazoezini pamoja na Anderson. Kulikuwa na matumaini kwamba angeanza, lakini Tuchel hakupendezwa na kile alichokiona.”

Inaelezwa kuwa Tuchel hakuonyesha imani kamili kwa Mainoo, na wakati mwingine aliamua kuwatumia wachezaji wengine kama Reece James katika eneo la kiungo, jambo ambalo lilimweka Mainoo pembeni kabisa ya mipango ya kocha huyo.

Hali ya kutofurahia kambini

Ripoti hizo pia zimegusia mtazamo wa mchezaji mwenyewe wakati wa michuano hiyo. Inadaiwa kuwa Mainoo hakuwa mwenye furaha na alikuwa akionyesha dhahiri kutoridhishwa na hali hiyo.

“Baada ya karibu kila mechi, Mainoo alikuwa mchezaji wa kwanza kuondoka uwanjani, akiwa peke yake na huku akiwa amevaa vizibao vya masikioni (headphones).”

Mtazamo huu wa Mainoo uliibua maswali ikiwa Tuchel alimchukulia kama kijana ambaye angeridhika tu kuwa sehemu ya kikosi cha Kombe la Dunia, au kama kuna tatizo kubwa la kutokuelewana baina ya kocha na mchezaji. Hadi sasa, imekuwa vigumu kubaini mpango kamili wa Tuchel kwa mchezaji huyo, kwani hata alipokuwa na nafasi ya kumtumia mchezaji mwenye pumzi, alipendelea kufanya mabadiliko mengine.

Kwa mashabiki wa Manchester United, hii ni hali ya kusikitisha kuona kipaji kikubwa kama cha Mainoo kikikosa fursa ya kuonyesha uwezo wake katika jukwaa kubwa la dunia.