Sababu zilizomfanya Arsenal kuikataa saini ya Sandro Tonali

Arsenal iliona gharama ni kubwa

Taarifa mpya zimebainisha sababu zilizofanya klabu ya Arsenal kujiondoa katika mbio za kumsajili kiungo wa Newcastle United, Sandro Tonali, kabla ya mchezaji huyo kukamilisha uhamisho wake wa pauni milioni 100 kujiunga na Tottenham Hotspur.

Ingawa kocha Mikel Arteta na mkurugenzi wa michezo wa Arsenal, Andrea Berta, walikuwa na nia ya kuimarisha safu yao ya kiungo baada ya msimu mzuri uliopita, waliamua kutofanya biashara hiyo. Kulingana na ripoti kutoka kwa mwandishi Lee Ryder, uamuzi wa Arsenal ulitokana na mzigo mkubwa wa kifedha uliokuwa ukihitajika.

Arsenal iliingiwa na hofu kutokana na kiwango cha mshahara alichokuwa akitaka mchezaji huyo, pamoja na ada za mawakala ambazo zilionekana kuwa juu mno kwa bajeti yao kwa wakati huo. Hii ilitoa fursa kwa Tottenham kuingia na kukamilisha dili hilo ambalo linajumuisha pauni milioni 92.5 za awali na nyongeza ya pauni milioni 7.5.

Tonali afunguka kujiunga na Tottenham

Sandro Tonali, ambaye kwa sasa anafanyiwa vipimo vya afya katika klabu yake mpya, ameeleza kuwa uamuzi wake wa kujiunga na Tottenham ulichochewa sana na uwepo wa kocha Roberto De Zerbi.

“De Zerbi alicheza nafasi kubwa katika uamuzi huu. Ni uamuzi wa kimaisha na pia kifamilia baada ya miaka mitatu niliyokaa Newcastle. De Zerbi anastahili sifa nyingi kwa sababu hakufanya hivyo kama rafiki pekee kutoka Brescia, bali kama mtu anayechapa kazi kwa bidii,” alisema Tonali wakati akizungumza na waandishi wa habari.

Mabadiliko makubwa kwa Tottenham

Uhamisho huu unaifanya Tottenham kuwa moja ya klabu zilizotumia pesa nyingi zaidi katika dirisha hili la usajili la majira ya joto ya 2026. Tonali anatarajiwa kulipwa mshahara wa pauni 275,000 kwa wiki, jambo ambalo linaonyesha nia ya dhati ya Spurs katika kuimarisha kikosi chao.

Tonali aliongeza kuwa kuondoka kwake Newcastle kulifanyika kwa maelewano mazuri.

“Tulikuwa na makubaliano na Newcastle, tulizungumza kila siku na mwisho tukafanikiwa. Tulitaka yaliyo bora kwa kila upande. Tumeachana kwa mahusiano mazuri, kila mtu anafuraha na niko tayari kwa changamoto hii mpya,” alimalizia kiungo huyo.

Wakati Arsenal ikipima uzito wa maamuzi yake, mashabiki wa Tottenham wanasubiri kuona mchango wa staa huyo wa Italia katika msimu ujao, huku kukiwa na maandalizi ya michuano ya Kombe la Dunia inayokuja hivi karibuni.