Sakata la usajili wa Yan Diomande: PSG wazidi kusuasua, Arsenal wakipata matumaini

Mvutano wa bei wachelewesha dili la Diomande

Safari ya kinda Yan Diomande kuelekea Paris Saint-Germain (PSG) inaonekana kukumbwa na changamoto mpya, hali inayozidi kuwapa matumaini wapinzani wao wanaomwinda nyota huyo, wakiwemo Arsenal, Liverpool na Manchester City.

Ingawa PSG ndio wanaonekana kuwa mstari wa mbele katika kumsajili mshambuliaji huyu mwenye umri wa miaka 19, mazungumzo na klabu yake ya RB Leipzig yamekuwa magumu kutokana na tofauti ya dau la usajili. Leipzig wanashikilia msimamo wao wa kutaka kiasi kisichopungua Euro milioni 120 (pauni milioni 103), wakati PSG wao wamesimama kwenye dau la pauni milioni 93.5.

Msimamo wa RB Leipzig

Mapema mwezi Juni, Mkurugenzi wa Michezo wa RB Leipzig, Marcel Schafer, alisisitiza kuwa nyota huyo wa Ivory Coast ataendelea kusalia nchini Ujerumani kwa msimu ujao. Alisema:

Yan Diomande atachezea RB Leipzig msimu ujao. Hatutabadilisha msimamo wetu. Tunajua thamani yake. Bila shaka, kama ataendelea na kiwango hiki, muda utafika tutamsaidia kupiga hatua nyingine, lakini siyo mwaka huu.

Licha ya kauli hiyo, wachambuzi wengi wanaamini kuwa hiyo ni mbinu ya klabu hiyo kuongeza thamani ya mchezaji huyo, kwani ofa ya pauni milioni 85 kutoka Liverpool ilishawahi kukataliwa hapo awali.

Arsenal na wengine wamekaa mkao wa kula

Kusuasua kwa PSG katika kukubaliana na bei inayotakiwa na Leipzig kumeleta mwanya kwa klabu nyingine kubwa kama Arsenal, Manchester City, na Real Madrid. Ingawa Diomande anatajwa kuvutiwa zaidi na maisha ya jijini Paris kuliko Ligi Kuu ya England (Premier League), kutokamilika kwa dili hilo kwa wakati kunaweza kubadilisha upepo.

Ripoti zinaeleza kuwa mawakala wa Diomande, kampuni ya Roc Nation, wanajaribu kuwashawishi viongozi wa PSG kuanza mazungumzo rasmi na Leipzig haraka iwezekanavyo ili kuzuia klabu nyingine kuingilia kati na kunyakua saini yake.

Wakati wa maamuzi

Ingawa PSG bado wapo kwenye nafasi nzuri ya kumnasa kinda huyo aliyeonesha kiwango cha hali ya juu katika michuano ya Kombe la Dunia msimu huu, kutokuwa makini kwao kunaweza kuwapa nafasi Arsenal na vigogo wengine wa soka barani Ulaya. Kwa sasa, mpira upo kwa PSG, na mashabiki wanasubiri kuona kama wataamua kuvunja benki ili kukamilisha usajili huu au wataruhusu fursa hiyo ipotee.