Sarakasi za Real Madrid: Haaland, Mourinho na Ahadi za Kichaa Kuelekea Uchaguzi wa Urais

Uchaguzi wa urais ndani ya klabu ya Real Madrid umekuwa kivutio kikubwa duniani baada ya Rais wa sasa, Florentino Perez, na mpinzani wake, Enrique Riquelme, kuanza kutumia kila mbinu ili kuwavutia mashabiki na wanachama kuwapigia kura.

Mambo yalianza kupamba moto baada ya Perez (79) kuitisha uchaguzi wa ghafla. Hii ilikuja baada ya vurugu za hivi karibuni ambapo wachezaji wake wawili walipigana mazoezini, na Perez akaamua kuitisha mkutano mrefu na waandishi wa habari ambapo aliwashambulia baadhi yao kwa majina. Ili kupoteza maboya na kurudisha udhibiti wa klabu, alitangaza uchaguzi wa mapema ambao ulionekana kuwekewa masharti magumu yaliyomfanya yeye pekee kufuzu kugombea.

Lakini ghafla akajitokeza Enrique Riquelme, kijana mdogo wa miaka 27 aliyepata utajiri wake kupitia nishati mbadala. Riquelme aliamua kusimama kidete kupambana na Perez, jambo ambalo limefanya kiti hicho kupata mpinzani kwa mara ya kwanza tangu mwaka 2004. Kampeni zao sasa zimegeuka kuwa za mtindo wa siasa za kushambuliana mwanzo mwisho.

Hapa kuna mambo makubwa yaliyofanya mchuano huu kuwa wa kusisimua:

5. Ahadi ya Kichaa ya Riquelme na Vibonzo vya TV

Siku ya Jumatano usiku, Riquelme alionekana kwenye kipindi maarufu cha televisheni nchini Hispania kiitwacho El Hormiguero. Hapa ndipo mambo yalipoanza kuwa ya ajabu. Kipindi hiki si cha michezo kama tunavyovijua, bali ni kipindi cha burudani ambapo mtangazaji husindikizwa na vibonzo viwili vya pinki kwenye skrini.

Mbele ya vibonzo hivyo, Riquelme alitoa ahadi kubwa: kwamba ameshamaliza dili la kumleta Erling Haaland Real Madrid ikiwa atashinda uchaguzi huo. Ili kuaminisha watu, alishika na kuonyesha jezi ya Real Madrid yenye jina la Haaland na namba 9 mgongoni.

4. Perez Alipojibu Mapigo kwa Tangazo la Mourinho

Florentino Perez si mtu wa mchezo mchezo. Wakati Riquelme akiwa bado anazungumza kwenye TV, kipindi kilienda mapumziko ya matangazo. Ghafla, likatokea tangazo lenye maandishi meupe kwenye skrini ya bluu yaliyosomeka:

“Wakati kwenye TV wakiwa wanaongea, kuongea na kuongea…”

Kisha tangazo hilo likamwonyesha kocha wa zamani wa Madrid, Jose Mourinho, akiwa amevaa vifaa vya Real Madrid na kusema neno moja tu: “Si” (Ndiyo). Kisha yakafuata maandishi ya kampeni: “Mpigie Kura Florentino 2026”.

Perez hakuishia hapo; alitangaza pia kuwa beki Ibrahima Konate atakuwa mchezaji wake wa kwanza kumsajili iwapo atachaguliwa tena. Riquelme alibaki ameduwaa baada ya kipindi kurejea hewani.

3. Mourinho Adai ni Teknolojia ya AI

Sarakasi hazikuishia hapo. Jose Mourinho, ambaye kwa sasa anafundisha klabu ya Benfica nchini Ureno, alishtushwa na tangazo hilo. Ripoti kutoka nchini Ureno zinasema kuwa Mourinho aliwasiliana haraka na uongozi wa Benfica akidai kuwa video hiyo imetengenezwa kwa teknolojia ya akili mnemba (AI). Hii ilikuwa ni hatua ya kuokoa kibarua chake, kwani kuonekana kwenye tangazo la timu nyingine kungeweza kusababisha afukuzwe kazi na kupoteza bonasi zake.

Hata hivyo, Real Madrid waliamua kufanya mambo haraka usiku huo huo kwa kuitumia Benfica taarifa rasmi kuwa wako tayari kulipa euro milioni 15 za kuvunja mkataba wa Mourinho wiki ijayo ili kumrejesha Santiago Bernabeu.

2. Familia ya Haaland Yapinga Vikali

Ili ahadi ya usajili ifanikiwe, lazima mchezaji na klabu yake wakubali. Erling Haaland ana mkataba mrefu na Manchester City, na thamani yake sokoni ni kubwa mno. Wazo la kwamba City wangekubali kumuuza kwa urahisi lilikuwa la kufikirika tu.

Haikuchukua muda mrefu, familia ya Haaland kupitia mwandishi nguli wa habari za usajili, Fabrizio Romano, ilikanusha vikali taarifa hizo:

“Inafurahisha sana lakini SI KWELI. Tunawatakia kila la kheri wagombea wote wawili katika uchaguzi wa Real Madrid.”

Manchester City wameripotiwa kukasirishwa na kitendo cha Riquelme kutumia picha na jina la mchezaji wao kwenye TV ya taifa na wanafikiria kuchukua hatua za kisheria.

1. Riquelme Aahidi Kulipia Wanachama 100,000 Ada Zao

Akijua kuwa nafasi yake ya kushinda ni ndogo, Riquelme ameamua kuahidi mambo makubwa zaidi. Baada ya kubanwa kuhusu Haaland na kiungo Rodri wa Man City, amesema kuwa akishindwa kutimiza ahadi hizo za usajili, atalipia ada za uanachama za wanachama wote (socios) 100,000 wa Real Madrid kwa mwaka mmoja.

Kila mwanachama wa Madrid analipa euro 174 kwa mwaka, hivyo dhamana hii inaweza kumgharimu Riquelme takriban euro milioni 12.3. Kwa bilionea huyo mwenye ukasi wa euro milioni 187, anaona hiyo ni gharama ndogo ya kuwekeza ili kupata kiti hicho kikuu cha Real Madrid.

Uchaguzi huu utafanyika Juni 7, 2026. Zikiwa zimebaki siku chache tu, wapenzi wa soka duniani wanajiandaa kushuhudia sarakasi nyingi zaidi kutoka kwa wagombea hawa wawili.