Scaloni na Martinez wailipua England baada ya kuondoshwa Kombe la Dunia

England walijipalia makaa, asema Scaloni

Argentina imefanikiwa kutinga fainali nyingine ya Kombe la Dunia baada ya kuichapa England mabao 2-1 katika mchezo wa nusu fainali uliopigwa Atlanta. Hata hivyo, ushindi huo umewafanya kocha Lionel Scaloni na kipa Emiliano Martinez kuibua mjadala mzito kuhusu mbinu za England katika mchezo huo.

England walikuwa wa kwanza kupata bao kupitia kwa Anthony Gordon katika dakika ya 55, lakini badala ya kuendeleza mashambulizi, kocha Thomas Tuchel aliamua kubadili mfumo na kuwa na safu ya ulinzi iliyojaa watu wengi, jambo ambalo lilitoa mwanya kwa Argentina kushambulia mfululizo.

Scaloni amesema kuwa waligundua wapinzani wao walikuwa wameanza kupoteza imani na wenyewe, jambo lililowapa motisha ya kuongeza kasi.

“Tulikuwa chini ya shinikizo kidogo, lakini mpinzani alianza kutiliana shaka wao kwa wao,” alisema Scaloni. “Sote tulihisi, tulinasikia harufu ya damu na tukashambulia. Tuliona nafasi wazi kwenye goli lao na tukaitumia.”

Martinez aichambua mbinu ya England

Kwa upande wake, kipa mkongwe Emiliano Martinez hakusita kuonyesha kutoridhishwa kwake na maamuzi ya England ya kujilinda muda wote baada ya kupata bao la uongozi.

Martinez anaamini kuwa England walifanya kosa kubwa la kurudi nyuma badala ya kutafuta bao la pili, kitendo ambacho kiliwapa Argentina nafasi ya kumiliki mchezo na hatimaye kusawazisha kupitia Enzo Fernandez na goli la ushindi la Lautaro Martinez.

“Tulilihisi hilo. Tuliwaona wakirudi nyuma na kurudi nyuma badala ya kusonga mbele,” alieleza Martinez. “Wakati mwingine unapokuwa unaongoza, ni lazima ushambulie. Huwezi kubadili mbinu zako kwa sababu tu unaongoza. Nadhani walikosea walipoamua kuongeza mabeki.”

Safari ya kuelekea fainali

Baada ya ushindi huu, Argentina sasa wanajiandaa kuikabili Hispania katika mchezo wa fainali utakaopigwa Jumapili hii New Jersey. Hii ni nafasi nyingine kwa miamba hiyo ya Amerika ya Kusini kuandika historia ya kuwa timu ya tatu pekee kushinda mataji mawili mfululizo ya Kombe la Dunia.

Scaloni alionekana mwenye fahari kubwa kwa kikosi chake, akisisitiza kuwa mafanikio haya yanatokana na moyo wa kupambana wa wachezaji wake.

“Sina maneno ya kuelezea. Ni furaha kubwa kwa nchi yetu. Hii ni timu ambayo haijui kukata tamaa na kila mara inanishangaza. Tutajaribu kila liwezekanalo kushinda fainali hii, tunajua ni ngumu sana, lakini tutatoa kila kitu uwanjani,” alihitimisha Scaloni.