Paul Scholes: Arsenal wamnunue Julian Alvarez ili kumsaidia Gyokeres

Ujumbe mzito kwa Mikel Arteta

Kiungo wa zamani wa Manchester United, Paul Scholes, ametoa ushauri mzito kwa uongozi wa Arsenal kuwekeza fedha nyingi ili kumnasa mshambuliaji wa Atletico Madrid, Julian Alvarez. Scholes anaamini mshambuliaji huyo raia wa Argentina ni mchezaji anayeweza kuleta tofauti kubwa klabuni hapo.

Alvarez, ambaye kwa sasa anahusishwa na mipango ya kuondoka Atletico Madrid ili kutimiza ndoto zake za kucheza katika klabu nyingine, ametajwa kuwa na thamani ya takriban pauni milioni 100. Licha ya Atletico Madrid kusema hawana mpango wa kumuuza mshambuliaji huyo mwenye miaka 26, Scholes anadhani ni fursa ambayo Arsenal haipaswi kuikosa.

Kwanini Julian Alvarez?

Akizungumza kwenye podcast ya The Good, The Bad & The Football, Scholes alisema kuwa soko la washambuliaji wa daraja la juu kwa sasa ni gumu, hivyo klabu yoyote kubwa inapaswa kumsajili mchezaji huyo mwenye uwezo wa kuamua matokeo.

“Kama Atletico Madrid wanataka pauni milioni 100, klabu yoyote kubwa inapaswa kwenda kumnasa. Hakuna mjadala hapa. Sioni kama kuna washambuliaji wengi wa daraja la juu wanaopatikana. Alvarez si mshambuliaji wa kati wa asili, yeye anapenda kuzunguka na ana uwezo mkubwa wa kufunga na kuamua mechi,” alisema Scholes.

Scholes aliongeza kuwa kwa kuzingatia viwango vya bei ya sasa ya wachezaji sokoni, kiasi hicho cha pesa ni cha kawaida kwa mchezaji mwenye kiwango cha Alvarez ambaye amekuwa akifanya vyema tangu atoke Manchester City.

Ushirikiano na Viktor Gyokeres

Wakati Arsenal ikijivunia kuwa na Viktor Gyokeres aliyesajiliwa msimu uliopita kwa pauni milioni 55 na kuwasaidia kutwaa ubingwa wa Ligi Kuu ya England, wataalamu wengi wanaona kuwa wawili hawa wanaweza kutengeneza kombinesheni hatari.

Nicky Butt, kiungo mwingine wa zamani wa Man United, anaamini kuwa Alvarez angekuwa mshirika kamili kwa Gyokeres ambaye ni mshambuliaji wa kati wa asili. “Angekuwa mshirika bora wa Gyokeres,” alisema Butt.

Hata hivyo, kumekuwa na uvumi kwamba Arsenal inaweza kutumia Gyokeres kama sehemu ya dili la kumpata Alvarez, lakini mshambuliaji huyo wa Sweden amesisitiza kuwa anafurahia maisha yake jijini London na hana mpango wa kuondoka baada ya msimu mzuri waliofanikiwa nao.

Alvarez, ambaye amefunga mabao 49 katika mechi 106 tangu ajiunge na Atletico Madrid mwaka 2024, kwa sasa anajikita kwenye michuano ya Kombe la Dunia akiwa na timu yake ya taifa ya Argentina, huku hatima yake ya klabu ikibaki kuwa gumzo kubwa katika dirisha hili la usajili.