Thomas Tuchel shakani England, Eddie Howe tayari kurithi mikoba

Mustakabali wa Tuchel watawaliwa na utata

Mustakabali wa Thomas Tuchel kama kocha mkuu wa timu ya taifa ya England unaonekana kuwa shakani. Hii inafuatia uchunguzi unaofanywa na Chama cha Soka cha England (FA) kufuatia matokeo yasiyoridhisha katika Kombe la Dunia lililomalizika mwezi Julai.

England iliondolewa katika hatua ya nusu fainali baada ya kupoteza kwa mabao 2-1 dhidi ya Argentina. Katika mchezo huo, England walitawala mchezo na kuongoza hadi dakika ya 72, lakini mabadiliko yaliyofanywa na Tuchel kwa kumtoa mfungaji wa bao, Anthony Gordon, na kumwingiza beki Ezri Konsa, yalionekana kubadili mwelekeo wa mchezo na kuwapa nafasi Argentina kufanya mashambulizi.

Eddie Howe anatajwa kuwa mrithi

Ripoti kutoka Football Insider zinaeleza kuwa FA kwa sasa inatafakari hatima ya kocha huyo Mjerumani, huku Eddie Howe akiibuka kama mgombea namba moja wa kuchukua nafasi hiyo. Howe, ambaye aliondoka Newcastle United msimu huu wa joto, anaelezwa kuwa yupo tayari kuipokea mikoba hiyo ya kuinoa ‘Three Lions’ kwani anaamini huu ni wakati mwafaka katika maisha yake ya ukocha.

Maoni ya Paul Scholes

Gwiji wa Manchester United, Paul Scholes, amekuwa na mtazamo tofauti juu ya mwenendo wa Tuchel. Scholes anaamini kuwa huenda Tuchel anatafuta njia ya kuondoka kwenye nafasi hiyo, akirejea tabia yake ya zamani ya kutofautiana na viongozi wa klabu alizozifundisha huko nyuma.

“Inaonekana kama anataka kuondoka kwa sababu ni vigumu kurejea baada ya mambo aliyokuwa akiyasema. Sikujua hadi niliposikia watu wakizungumzia jinsi alivyokuwa akitofautiana na watu katika klabu alizowahi kuzifundisha hapo awali. PSG, Dortmund, Bayern Munich; mara zote amekuwa akitofautiana na watu, labda anatafuta njia ya kutokea,” alisema Scholes.

Changamoto ya kikosi cha England

Scholes pia aliongeza kuwa England ina wachezaji wenye vipaji vikubwa binafsi, lakini tatizo kubwa linalowakabili ni kutokuwa na ushirikiano kama timu moja.

“Tunapolinganisha na timu kama Hispania, nadhani sasa tuna wachezaji bora zaidi mmoja mmoja. Lakini tatizo letu kubwa, na hili halijaanza leo, ni kwamba hatuchezi kama timu. Sioni kama kila mmoja anajali kile kinachotokea kwa mwenzake, wachezaji wanaonekana kuwa wabinafsi,” aliongeza Scholes.

Kwa sasa, mashabiki wengi wa England wameonyesha kutokuridhishwa na mwenendo wa Tuchel, licha ya kuwa ana mkataba unaomalizika mwaka 2028. Uamuzi wa mwisho wa FA utatoa majibu ya kama kocha huyo ataendelea au atapisha njia kwa ajili ya sura mpya.