Tottenham kutoa Pauni milioni 70 kumnasa Savinho kutoka Man City

Tottenham katika harakati za kuimarisha safu ya ushambuliaji

Klabu ya Tottenham Hotspur inaendelea na mikakati yake ya kusuka upya kikosi chao kuelekea msimu mpya. Baada ya kufanikiwa kuimarisha eneo la kiungo kwa kuwasajili Sandro Tonali na Matheus Fernandes, pamoja na kuongeza nguvu katika safu ya ulinzi kwa kuleta nyota kama Jan Paul van Hecke, Marcos Senesi, na Andy Robertson, sasa macho ya klabu hiyo yameelekezwa kwenye safu ya ushambuliaji.

Ripoti mbalimbali zinaeleza kuwa Spurs bado wanahitaji kuongeza ubora zaidi katika eneo la mbele, hasa kwa kutafuta mawinga wapya na washambuliaji ili kuongeza makali ya kufunga mabao.

Savinho na Gakpo ndio malengo makuu

Mtaalamu wa masuala ya usajili barani Ulaya, Fabrizio Romano, amethibitisha kuwa Tottenham wako katika mazungumzo na wanafanyia kazi dili mbili kubwa za mawinga. Licha ya kuwepo kwa tetesi nyingi kuhusu mshambuliaji Folarin Balogun, Romano ameweka wazi kuwa kwa sasa hakuna mazungumzo yoyote yanayoendelea kuhusiana na mchezaji huyo.

“Kwenye nafasi ya mawinga, Spurs wanafanyia kazi dili hizi mbili. Hakuna mazungumzo kwa Folarin Balogun. Najua kumekuwa na ripoti nyingi katika saa 24 zilizopita, lakini Tottenham hawafanyi kazi kwenye dili la Balogun, angalau kwa siku ya leo. Kuhusu siku zijazo, tutaona.”

Romano aliongeza kuwa malengo makuu ya klabu hiyo kwa sasa ni mawinga wawili: Cody Gakpo wa Liverpool na Savinho wa Manchester City, huku jina la Pedro Neto likitajwa kama mbadala iwapo dili hizo zitashindikana, ingawa mchezaji huyo anatajwa kuwa ghali sana.

Ofa ya Pauni milioni 70 mezani

Katika hatua nyingine, taarifa kutoka nchini Brazil kupitia ESPN zimebainisha kuwa Tottenham wamepanga kutoa kitita cha pauni milioni 70 ili kumnasa Savinho. Mbrazili huyo amekuwa akihusishwa na kutaka kujiunga na Spurs kwa muda mrefu sasa, hasa baada ya kupoteza nafasi katika kikosi cha kwanza cha Manchester City.

Inaelezwa kuwa mazungumzo kati ya pande zote mbili yanaendelea vizuri, na kuna uwezekano mkubwa wa Tottenham kufikia makubaliano na Manchester City kwa kiasi hicho cha fedha. Hata hivyo, dili hilo bado halijafika hatua za mwisho kwa sababu Manchester City bado haijapata mbadala sahihi wa kuziba nafasi ya winga huyo mara atakapoondoka.

Mashabiki wa Spurs sasa wanasubiri kuona ikiwa uongozi wa klabu hiyo utafanikiwa kumaliza dili hizi mbili muhimu ili kukiimarisha kikosi chao kuelekea changamoto ya msimu ujao.