Tottenham wanataka kunyakua mastaa watatu; Gakpo, Savinho na Marmoush

Tottenham wanaendeleza ujenzi wa kikosi chao

Tottenham Hotspur wanaonekana kuamua kutumia fedha nyingi msimu huu ili kuhakikisha hawapiti tena katika changamoto za kupambana kuepuka kushuka daraja kama ilivyokuwa msimu uliopita. Klabu hiyo tayari imekamilisha usajili wa wachezaji sita wapya na sasa inakaribia kuongeza nguvu zaidi kupitia kwa Savinho, Omar Marmoush, na Cody Gakpo.

Kocha Roberto De Zerbi ameonekana kuwa na maono mapya kwa timu hiyo, akilenga kuimarisha safu yake ya ushambuliaji ili kuwa tishio msimu huu.

Savinho karibu kutua London

Mwandishi maarufu wa habari za usajili, Fabrizio Romano, amethibitisha kuwa Tottenham imefikia makubaliano ya msingi na Manchester City kumnasa winga wa Brazil, Savinho. Inatajwa kuwa ada ya uhamisho huo itafikia Pauni milioni 80, ikiongezeka kwa Pauni milioni 5 kama bonasi.

“Savinho amekuwa mlengwa mkuu tangu siku ya kwanza ya dirisha la usajili. Roberto De Zerbi alimtaka yeye kama kipaumbele chake cha kwanza, na sasa anampata,” alisema Romano.

Mchezaji huyo tayari amepewa ruhusa ya kwenda kufanyiwa vipimo vya afya na kukamilisha taratibu za mkataba wake ndani ya saa 24 zijazo.

Marmoush na Gakpo wanatazamiwa pia

Mbali na Savinho, Tottenham wanaendelea na mazungumzo kwa ajili ya Omar Marmoush. Inaelezwa kuwa klabu hiyo tayari imekubaliana na mchezaji huyo kuhusu maslahi binafsi, na sasa wanachosubiri ni kukamilisha makubaliano ya klabu kwa klabu, ambapo kuna matumaini makubwa ya kufanikiwa.

Wakati huo huo, Tottenham wameweka mezani ofa kwa ajili ya winga wa Liverpool, Cody Gakpo. Hata hivyo, Liverpool inaonekana kusita kutoa jibu la haraka, ikisubiri kwanza kupata mbadala wake, hasa baada ya Gakpo kuonyesha kiwango bora katika mchezo wa kirafiki dhidi ya Como ambapo alifunga bao na kutoa pasi ya bao.

Ripoti kutoka Uholanzi zinaeleza kuwa Gakpo yuko tayari kujiunga na Spurs, lakini maamuzi ya mwisho bado yapo mikononi mwa mabosi wa Liverpool ambao wameanza kusita kumruhusu aondoke kufuatia kiwango chake cha hivi karibuni.