Tottenham yafukuzia saini ya Kroupi, Bournemouth wagoma kirahisi

Bournemouth wazuia mpango wa Spurs kwa Kroupi

Klabu ya Bournemouth imedhamiria kuhakikisha inabaki na mshambuliaji wake matata, Eli Junior Kroupi, huku kukiwa na taarifa kuwa Tottenham Hotspur wanataka kumsajili nyota huyo kwa gharama kubwa.

Kroupi, ambaye thamani yake sokoni inatajwa kufikia Pauni milioni 85, amekuwa kwenye rada za Tottenham ambao wamekuwa wakifanya marekebisho makubwa kwenye kikosi chao baada ya msimu uliopita kuwa na changamoto nyingi. Bournemouth wanaonekana kutotaka kumuachia mchezaji huyo na wamepanga kufanya kila mbinu ili kuzima ndoto za Spurs kumpata.

Mwandishi wa habari, Pete O’Rourke, amedhibitisha kuwa nia ya Tottenham ipo wazi, lakini kazi si rahisi. Aliliambia Football Insider:

“Kroupi ni mchezaji ambaye Spurs wanavutiwa naye kwa dhati. Hata hivyo, kama watafanikiwa kumpata au la, ni jambo gumu sana. Bournemouth wanafanya kila wawezalo kumbakiza na wameweka bei kubwa sana kwa ajili yake.”

Tottenham katika mbio za kumsaka Rubén Vargas

Sambamba na harakati za kumpata Kroupi, Tottenham pia wanahusishwa na mpango wa kumsajili mshambuliaji wa Sevilla, Rubén Vargas. Mchezaji huyu wa kimataifa wa Uswizi anatajwa kuwa na thamani ya takriban Pauni milioni 13.

Hata hivyo, Spurs hawako peke yao katika kinyang’anyiro hiki. West Ham United inatajwa kuwa klabu iliyoonyesha nia thabiti zaidi kufikia sasa, huku Brighton wakitajwa kuwa miongoni mwa timu zinazofuatilia kwa karibu hali ya mchezaji huyo kabla ya kufanya uamuzi.

Chris Waddle apongeza usajili wa Spurs

Katika upande mwingine, mkongwe wa Tottenham, Chris Waddle, ameonyesha kufurahishwa na namna klabu hiyo inavyosajili wachezaji wenye uzoefu wa Ligi Kuu ya England (Premier League). Mpaka sasa, Spurs imeshakamilisha usajili wa nyota kama Jan Paul van Hecke, Sandro Tonali, na Mateus Fernandes, huku pia wakipata wachezaji huru kama Andry Robertson, Martin Dubravka, na Marcos Senesi.

Waddle anaamini kuwa mkakati huu wa kuleta wachezaji waliozoea ligi ni sahihi kwa mustakabali wa klabu hiyo.

“Inapendeza kuona wanashindana sokoni na kununua wachezaji waliothibitisha viwango vyao. Wanapata wachezaji ambao tayari wanaijua ligi na wamefanya vizuri kwingineko. Hicho ndicho kitu Tottenham walikuwa wanakikosa; wachezaji wenye uzoefu wa kweli wa Premier League,” alisema Waddle.

Kwa mtazamo wa Waddle, Tottenham wapo kwenye njia sahihi ya kurejea kwenye nafasi za juu, akisisitiza kuwa kikosi hicho kina uwezo wa kupambana kufika kwenye nafasi sita za juu msimu ujao.