Tottenham yafanya kweli kumsaka Emiliano Martinez, De Zerbi agoma kumuachia Moore

Tottenham yajipanga kumpata Emiliano Martinez

Klabu ya Tottenham Hotspur imeonyesha dhamira ya wazi ya kuimarisha safu yake ya ulinzi baada ya kufikia makubaliano ya kumuachia kipa wao, Guglielmo Vicario, kujiunga na Juventus. Taarifa za hivi karibuni zinaeleza kuwa Spurs wameanza mchakato wa kumsaka kipa namba moja wa Aston Villa, Emiliano Martinez.

Uhamisho wa Vicario kwenda Juventus unatajwa kuwa wa mkopo wenye kipengele cha kumnunua jumla mwishoni mwa msimu. Hatua hii imeiacha Tottenham katika msako mkali wa kupata mrithi wa haraka wa kipa huyo wa Italia, huku jina la Martinez likitajwa kuwa kipaumbele cha kocha Roberto De Zerbi.

Kwa upande wa Aston Villa, inaonekana wako tayari kumruhusu kipa huyo raia wa Argentina kuondoka, hasa baada ya kufanikiwa kumsajili kipa Zion Suzuki kutoka Parma. Inasemekana kuwa Suzuki ndiye anayepangwa kuwa chaguo la kwanza katika kikosi cha Villa kwa msimu wa 2026-27, jambo linalomfungulia mlango Martinez kutafuta changamoto mpya kwingineko ndani ya Ligi Kuu ya Uingereza.

Roberto De Zerbi azuia dili la Mikey Moore

Wakati sakata la kipa likiendelea, mambo si shwari kwa winga kijana wa Tottenham, Mikey Moore. Mchezaji huyo ambaye msimu uliopita alikuwa kwa mkopo katika klabu ya Rangers, alikuwa karibu kukamilisha dili la kwenda Cologne nchini Ujerumani kwa mkopo mwingine.

Hata hivyo, kocha Roberto De Zerbi ameweka ngumu. Ripoti zinaeleza kuwa kocha huyo amezuia dili hilo kukamilika kwa sasa akisubiri kwanza kuona usajili wa wachezaji wa safu ya ushambuliaji unaofanywa na klabu hiyo.

De Zerbi anaonekana kutaka kuwa na uhakika wa kina cha kikosi chake kwanza kabla ya kuruhusu wachezaji wengine kuondoka. Ingawa Cologne bado wana matumaini kuwa dili hilo litafanikiwa, kwa sasa hatima ya Moore inabaki mikononi mwa maamuzi ya kiufundi ya kocha huyo raia wa Italia.

Mabadiliko makubwa Spurs

Kuelekea msimu mpya, Tottenham imekuwa ikifanya usajili mkubwa ili kuepuka hali ya hatari waliyoipata msimu uliopita ambapo walinusurika kushuka daraja katika mchezo wa mwisho wa ligi. Mpaka sasa, wachezaji kadhaa wameshatua klabuni hapo wakiwemo Andy Robertson, Marcos Senesi, Jan Paul van Hecke, Martin Dubravka, Mateus Fernandes, na Sandro Tonali.

Uongozi wa Spurs unafanya kila liwezekanalo ili kumpa De Zerbi kikosi chenye ushindani kitakachoweza kuleta matokeo bora msimu huu na kurejesha heshima ya klabu hiyo kwenye ramani ya soka la England.