Tottenham yashauriwa kumsajili Eli Junior Kroupi sasa kabla bei haijapanda

Tottenham yapewa angalizo kuhusu Kroupi

Klabu ya Tottenham Hotspur imepokea ushauri mzito kutoka kwa mdau wa soka, John Wenham, ambaye amedai kuwa dirisha hili la usajili ndilo fursa pekee kwa klabu hiyo kumnasa mshambuliaji matata wa Bournemouth, Eli Junior Kroupi.

Kroupi, mwenye thamani ya pauni milioni 85, amekuwa kwenye rada za Spurs baada ya kuonyesha kiwango bora katika msimu wake wa kwanza wa Ligi Kuu ya Uingereza, ambapo alifanikiwa kufunga mabao 13. Wenham anaamini kuwa kama Tottenham wanahitaji huduma ya nyota huyu, ni lazima wafanye maamuzi haraka kabla thamani yake haijapaa zaidi.

Fursa ya dhahabu kwa Spurs

Akizungumza na Tottenham News, Wenham alisisitiza kuwa nafasi hii inaweza kupotea ikiwa mchezaji huyo ataendeleza makali yake msimu ujao, hasa ikizingatiwa kuwa Bournemouth watashiriki michuano ya Europa League baada ya kumaliza msimu uliopita wakiwa nafasi ya sita.

“Tottenham wanapaswa kuwa sokoni kutafuta mshambuliaji, na Kroupi angekuwa usajili bora sana kama watafanikiwa kumpata. Nahisi huu unaweza kuwa wakati pekee kwa Tottenham kumpata. Kama ataendeleza kiwango chake msimu ujao huku akicheza Europa League, umaarufu wake utaongezeka maradufu duniani kote.”

Wenham aliongeza kuwa ingawa bei ya pauni milioni 85 hadi 90 inaweza kuonekana kama ni gharama kubwa kwa baadhi ya watu, ni uwekezaji ambao Tottenham wanapaswa kuufanya ili kuondokana na changamoto za kumaliza msimu katika nafasi zisizoridhisha.

Safu ya ushambuliaji ni tatizo

Uchambuzi wa kikosi cha sasa cha kocha Roberto De Zerbi unaonyesha kuwa safu ya ushambuliaji ya Spurs bado ina mapungufu makubwa. Baada ya kuondoka kwa Randal Kolo Muani, kikosi hicho kimebakiza chaguo chache ambazo hazijatoa matokeo ya kuridhisha.

Kwa sasa, Tottenham wanawategemea Dominic Solanke, ambaye msimu uliopita alikumbwa na majeraha ya mara kwa mara, pamoja na Richarlison ambaye mkataba wake unaelekea ukingoni baada ya kubakiza miezi 10 tu. Ukweli ni kwamba, ni Richarlison pekee aliyefunga zaidi ya mabao 10 msimu uliopita, hali inayothibitisha umuhimu wa kuleta damu mpya mbele.

Spurs tayari wametumia kiasi cha pauni milioni 230 katika dirisha hili kuimarisha safu ya ulinzi na kiungo. Hivyo, kuongeza mshambuliaji mmoja au wawili ndilo litakalokuwa pambo la mwisho katika kile kinachoonekana kuwa ni ujenzi wa kikosi imara kwa ajili ya ushindani msimu ujao.