Tottenham yafanya kweli, yavamia Chelsea kumnasa Mudryk na Tosin

Katika mshangao mkubwa kwenye dirisha hili la usajili, Tottenham Hotspur imeamua kuhamishia nguvu zake Stamford Bridge kwa lengo la kuimarisha kikosi chake cha Roberto De Zerbi kabla ya dirisha kufungwa Jumanne usiku.

Taarifa za hivi punde zinaeleza kuwa Spurs ipo kwenye mazungumzo ya hali ya juu kumnasa winga Mykhailo Mudryk kwa mkopo, huku ikipanga pia kumsajili beki Tosin Adarabioyo kwa mkataba wa kudumu.

Ukaribu wa De Zerbi na Mudryk

Juhudi za Tottenham kumsajili Mudryk zimekuja baada ya mipango yao ya kumnasa Iliman Ndiaye kutoka Everton kukwama, kwani mchezaji huyo anaelekea Manchester City kwa ada ya pauni milioni 65. Kwa upande wa Mudryk, inaonekana kocha Roberto De Zerbi amekuwa na ushawishi mkubwa katika dili hili.

Kumbuka kuwa De Zerbi aliwahi kufanya kazi na Mudryk wakiwa Shakhtar Donetsk, jambo ambalo linaelezwa kuwa sababu kuu iliyomfanya mchezaji huyo kukubali kutua Tottenham akiiacha Leeds United ambayo ilikuwa ikimuwinda.

“Tottenham wapo kwenye mazungumzo ya kumsajili winga Mykhailo Mudryk kwa mkopo kutoka Chelsea. Dili hili limefanyika baada ya kuingilia mazungumzo ya Leeds United na linasonga mbele kwa kasi,” alithibitisha mwandishi wa BBC, Nizaar Kinsella.

Mpango wa Tosin Adarabioyo

Sambamba na dili la Mudryk, Tottenham ina hamu kubwa ya kumsajili beki Tosin Adarabioyo. Awali, Spurs ilitaka kumsajili beki huyo kwa mkopo, lakini kutokana na kanuni za Ligi Kuu ya England (Premier League) zinazozuia klabu kuchukua zaidi ya mchezaji mmoja kwa mkopo kutoka klabu moja, wameamua kubadilisha mbinu.

Fabrizio Romano amebainisha kuwa Tottenham wako tayari kumsajili Tosin kwa mkataba wa kudumu ili kurahisisha mchakato huo, huku wakijua kuwa Mudryk atakuja kwa mkopo. Hii inaonyesha jinsi ambavyo Spurs imedhamiria kujiboresha baada ya kuanza vibaya msimu huu wa 2026/27 kwa kupoteza michezo miwili ya kwanza.

Shinikizo kwa De Zerbi

Ingawa Tottenham imetumia zaidi ya pauni milioni 300 tangu kuanza kwa dirisha hili la usajili kwa kuleta nyota kama Sandro Tonali, Savio, na wengineo, matokeo mabaya ya awali yameleta presha kubwa kwa kocha De Zerbi.

Uongozi wa klabu unaonekana kuendelea kumpa sapoti kocha huyo ili kuhakikisha kikosi kinakuwa na ushindani. Huku kukiwa na tetesi za wachezaji kama Richarlison na Pape Matar Sarr huenda wakaondoka, usajili wa Mudryk na Tosin unaonekana kuwa hatua muhimu ya kuziba mapengo na kutoa sura mpya katika kikosi cha Spurs kabla ya muda wa dirisha la usajili kumalizika.