Thomas Tuchel ahoji utayari wa Cole Palmer kuitumikia England

Tuchel azungumzia kitendo cha Palmer kujitoa

Kocha mkuu wa timu ya taifa ya England, Thomas Tuchel, ametoa msimamo wake mzito kuhusu kiungo mshambuliaji wa Chelsea, Cole Palmer, baada ya mchezaji huyo kujitoa katika kikosi cha England kwa ajili ya mechi za kimataifa za sasa.

Palmer, ambaye amekuwa na kiwango bora tangu kuanza kwa msimu huu, alikuwa miongoni mwa wachezaji watano waliojiondoa kikosini kwa kile kilichotajwa kuwa ni sababu ya ‘usimamizi wa mzigo wa kazi’ (load management). Hata hivyo, hali hiyo haijamfurahisha kocha wake.

Fursa iliyopotea

Katika mahojiano na waandishi wa habari, Tuchel alionyesha wazi kuwa anakubaliana na maoni kuwa mchezaji huyo anaonekana kutokuwa na shauku kubwa ya kuitumikia timu ya taifa kwa sasa. Alisisitiza kuwa Palmer amekuwa akikosa kambi nyingi za mazoezi, jambo ambalo linaathiri mipango yake ya ujenzi wa kikosi.

“Ni vigumu kubishana na kile unachokisema. Ni fursa nyingine iliyopotea. Anakosa fursa nyingi sana na simlaumu kwa hilo, lakini huo ndio ukweli. Anakosa kambi nyingi sana za mazoezi kutokana na majeraha,” alisema Tuchel.

Umuhimu wa ushirikiano na ‘ubradha’

Tuchel alisisitiza kuwa ili mchezaji aweze kushawishi nafasi yake kikosini, ni lazima awe na timu katika mazoezi na mechi. Kocha huyo wa zamani wa Chelsea, Paris Saint-Germain, na Bayern Munich, alieleza kuwa anataka kutegemea wachezaji anaowaona ana kwa ana uwanjani.

Aliongeza kuwa katika timu yake ya taifa, anajenga utamaduni wa ‘ubradha’ (brotherhood) na umoja, ambao hauwezi kujengwa kama mchezaji hayupo kikosini.

“Kama haupo kambini, kuna hatua nyingine ya kuonyesha kiwango ambayo huwezi kuifikia kwa sababu unapaswa kuwa na mimi uwanjani na nasi uwanjani. Hatuwezi kulegeza kamba katika hilo na hatutaruhusu hali ya kuhisi kuwa wachezaji hawataki kuja iingie kikosini. Tunajikita kwa wale wanaotaka kwa dhati kuchezea England,” aliongeza Tuchel.

Tofauti na klabu

Tuchel alitoa dongo pia kuhusu jinsi klabu zinavyoshughulikia wachezaji wanapokuwa na maumivu madogo, akisema kuwa yeye anataka mazingira ambapo wachezaji wanafurahia kuwepo pamoja. Ingawa alikiri kuwa Palmer ana maumivu yanayomfanya ashindwe kushindana katika kiwango cha juu, alisisitiza kuwa yeye atawapa kipaumbele wale walio tayari kujitolea.