Ubelgiji yaifunga Marekani, yajibu mapigo kwa kejeli baada ya utata wa Folarin Balogun

Ubelgiji yaibuka kidedea dhidi ya wenyeji

Timu ya taifa ya Ubelgiji imefanikiwa kutinga robo fainali ya Kombe la Dunia baada ya kuichapa Marekani mabao 4-1 katika mchezo wa hatua ya 16 bora uliopigwa Jumatatu. Ushindi huu umekuja huku kukiwa na hisia kali nje ya uwanja kuhusu maamuzi ya FIFA kumruhusu mshambuliaji wa Marekani, Folarin Balogun, kucheza mchezo huo licha ya kupewa kadi nyekundu katika mechi iliyopita.

Ubelgiji ilionyesha kiwango bora uwanjani na kuwanyamazisha wenyeji hao, huku kiungo Nicolas Raskin akisisitiza kuwa ushindi huo ulikuwa wa haki kufuatia utata uliotawala kabla ya mchezo kuanza.

Utata wa kadi nyekundu ya Balogun

Kabla ya mchezo huo, kulikuwa na mjadala mkali baada ya Balogun kuruhusiwa kucheza licha ya kupata kadi nyekundu dhidi ya Bosnia na Herzegovina katika hatua ya 32 bora. Kwa kawaida, kadi nyekundu hubeba adhabu ya moja kwa moja ya kukosa mchezo unaofuata, lakini FIFA ilisitisha adhabu hiyo chini ya Kifungu cha 27 cha Kanuni za Nidhamu.

Imeelezwa kuwa hatua hiyo ilifuatia ombi la Rais wa Marekani, Donald Trump, kwa Rais wa FIFA, Gianni Infantino, ili kupitia upya shauri hilo. Ingawa FIFA ilisisitiza kuwa vyombo vyake vya kisheria vinafanya kazi kwa uhuru, uamuzi huo uliibua malalamiko mengi kutoka kwa shirikisho la soka la Ubelgiji, ambalo lilipinga ushiriki wa Balogun hadi saa chache kabla ya mpira kuanza.

Ujumbe mzito wa Ubelgiji

Baada ya ushindi huo mkubwa, Ubelgiji haikuficha hisia zao. Kwenye mitandao yao ya kijamii, walichapisha picha ya Romelu Lukaku akishangilia bao la nne la timu hiyo huku wakiandika ujumbe wa kejeli:

“Overturn this” (Geuza hili sasa).

Akizungumzia hali hiyo, Raskin alisema:

“Kama nilivyosema, naamini siku zote haki ipo mahali fulani maishani. Kile kilichotokea hatukuona kama kilikuwa cha haki. Lakini leo, nadhani tumepata bahati kidogo. Tulihitaji kushinda mchezo huu na kupeleka ujumbe sahihi.”

Mtazamo wa kocha Rudi Garcia

Licha ya wachezaji wake kuonekana kuguswa na sakata hilo, kocha wa Ubelgiji, Rudi Garcia, alijaribu kupunguza makali ya mgogoro huo katika mkutano na waandishi wa habari.

“Haikuwa lazima kutumia hilo kama kichocheo. Kilichokuwa muhimu kwetu ni mpango wetu wa mchezo,” alisema Garcia. Aidha, kocha huyo alifichua kuwa alizungumza na Balogun baada ya mchezo kumalizika.

“Alikuja kuzungumza nami, jambo ambalo nalipenda sana. Sio kosa lake, yeye sio wa kulaumiwa na ndicho nilichomwambia,” aliongeza Garcia.

Sasa Ubelgiji inajiandaa kumenyana na Hispania katika jiji la Los Angeles siku ya Ijumaa, huku wakitafuta tiketi ya kuingia nusu fainali ya michuano hii mikubwa duniani.