Victor Osimhen afunguka kuhusu taarifa za kujiunga na Arsenal

Osimhen ajibu tetesi za Arsenal

Mshambuliaji wa Galatasaray, Victor Osimhen, amevunja ukimya kufuatia taarifa zilizokuwa zikimhusisha na uwezekano wa kujiunga na mabingwa wa Premier League, Arsenal, katika dirisha hili la usajili.

Mchezaji huyo wa kimataifa wa Nigeria amejikuta kwenye vichwa vya habari hivi karibuni huku kukiwa na taarifa kuwa Arsenal, chini ya kocha Mikel Arteta na mkurugenzi wa michezo Andrea Berta, wana hamu ya kuongeza nguvu kwenye safu yao ya ushambuliaji kabla ya kuanza kwa msimu mpya.

Akizungumza na waandishi wa habari nchini Uturuki baada ya kufunga mabao mawili katika sare dhidi ya Corum FK mwishoni mwa juma, Osimhen alisisitiza kuwa kwa sasa mawazo yake yapo kwenye majukumu yake ya uwanjani na siyo tetesi za uhamisho.

“Kila wakati kwenye madirisha ya usajili kunakuwa na tetesi nyingi. Nitalishughulikia suala langu binafsi. Nimejikita kwenye kazi yangu, kisha tutaona na kufikiria zaidi hapo baadaye,” alisema Osimhen.

Msimamo wa Galatasaray

Wakati kukiwa na uchambuzi kuwa Arsenal inaweza kupata saini ya mchezaji huyo kwa kiasi cha takriban £60 milioni, uongozi wa Galatasaray umekuwa na msimamo tofauti na mkali kuhusu staa huyo.

Rais wa klabu hiyo, Dursun Ozbek, ameweka wazi kuwa hana nia yoyote ya kumuuza Osimhen, akisisitiza kuwa hatofanya uamuzi wowote utakaokuwa na madhara kwa maslahi ya klabu yao.

“Sitakubali kufanya shughuli yoyote ambayo itaisababishia Galatasaray madhara au kutokuwa na faida kwetu. Haijalishi kiasi cha pesa kitakachotajwa, siwezi kumuuza Osimhen,” alisisitiza Ozbek.

Je, Arsenal inahitaji mshambuliaji?

Kwa upande mwingine, wachambuzi wa masuala ya soka wanaona kuwa usajili wa Osimhen utakuwa ni hatua kubwa kwa Arsenal. Pete O’Rourke, mchambuzi wa Football Insider, anaamini kuwa mchezaji huyo anaweza kuvutiwa na wazo la kucheza Premier League.

O’Rourke aliongeza kuwa ingawa Arsenal awali ilikuwa ikimtafuta mshambuliaji anayemudu kucheza pembeni, uwezo na bei ya Osimhen vinaweza kuwashawishi mabingwa hao kufanya mabadiliko ya mipango yao.

“Kama Osimhen atapatikana kwa kiasi hicho cha pesa na ana nia ya kujiunga na mabingwa wa Premier League, nina uhakika Arsenal watalifanyia kazi jambo hilo kwa umakini,” alisema O’Rourke.

Hata hivyo, changamoto nyingine inayotajwa ni mshahara mkubwa anaolipwa mchezaji huyo nchini Uturuki, ambao unakadiriwa kuzidi £300,000 kwa wiki, jambo ambalo linaweza kuleta gharama kubwa kwa Arsenal kama watakamilisha usajili huo.