Vinicius Junior afunguka kuhusu mpango wa kujiunga na Arsenal

Vinicius Junior abaki na msimamo wake Madrid

Ndoto za Arsenal kumnasa winga hatari wa Real Madrid, Vinicius Junior, zinaonekana kukwama baada ya mchezaji huyo kuweka wazi kuwa kipaumbele chake ni kubaki katika dimba la Santiago Bernabeu. Katika siku za hivi karibuni, kumekuwa na taarifa nyingi zikimhusisha staa huyo wa Brazil na kutua jijini London, lakini inaonekana mchezaji mwenyewe ana mipango tofauti.

Ripoti kutoka vyombo mbalimbali vya habari nchini Hispania zinasema kuwa Arsenal, kupitia kocha Mikel Arteta na mkurugenzi wa michezo Andrea Berta, walikuwa wakifuatilia kwa karibu hali ya mkataba wa mshambuliaji huyo. Mkataba wa sasa wa Vinicius unatarajiwa kumalizika mwaka 2027, jambo ambalo liliwafanya The Gunners kuona ni fursa sahihi ya kujaribu kumshawishi kujiunga na kikosi chao.

Msimamo wa mchezaji

Mwandishi wa habari za michezo kutoka Hispania, Jorge C Picon, amethibitisha kupitia mitandao ya kijamii kuwa Vinicius Junior bado ana nia ya dhati ya kuendelea kusalia ndani ya Real Madrid.

“Vinicius Junior anataka kubaki Real Madrid. Hiki ndicho kinachotolewa na watu wake wa karibu, wakisisitiza kuwa kipaumbele chake hakijabadilika: ni kuongeza mkataba mpya,” aliandika Picon.

Ingawa Arsenal wamethibitisha ndani kwa ndani kuwa wana nia ya dhati ya kumsajili, vyanzo vinavyomzunguka mchezaji huyo vimesisitiza kuwa hadi sasa, hakuna mawasiliano rasmi yaliyofanyika kati ya pande hizo mbili.

Hali ilivyo ndani ya Madrid

Licha ya mchezaji kutaka kubaki, hali ndani ya klabu ya Real Madrid inaonekana kuwa ngumu. Mazungumzo ya mkataba mpya yamekuwa yakisuasua kwa miezi kadhaa sasa, na klabu haionekani kuwa na nia ya kuongeza ofa yao ya sasa.

Rais wa klabu, Florentino Perez, anajikuta katika hali tete. Klabu inahofia hatari ya mchezaji huyo kuingia katika mwaka wa mwisho wa mkataba wake bila kusaini nyongeza, jambo ambalo linaweza kuwafanya wapoteze huduma yake bure ifikapo mwaka 2027. Kwa sababu hiyo, wapo tayari kusikiliza ofa itakayofikia Euro milioni 160 kama mchezaji atasisitiza kutaka kuondoka.

Vinicius anatarajiwa kurejea kikosini mwishoni mwa wiki hii, huku mustakabali wake ukiwa gumzo kubwa. Wakati klabu ikiamini kuwa huenda ikawa vigumu kuepuka mchezaji huyo kuingia mwaka wa mwisho wa mkataba wake, bado kuna matumaini madogo kuwa makubaliano yanaweza kufikiwa wakati wa msimu wa 2026/27.