Virgil van Dijk kuhusishwa na AC Milan, Liverpool yajipanga kumsajili mrithi wake

Mustakabali wa Virgil van Dijk jijini Anfield

Mustakabali wa beki kisiki na nahodha wa Liverpool, Virgil van Dijk, umezua mjadala mzito nchini Italia na Uingereza huku kukiwa na taarifa za uwezekano wa yeye kuondoka klabuni hapo mwishoni mwa msimu huu.

Van Dijk mwenye umri wa miaka 35, bado anaonekana kuwa mhimili mkubwa katika safu ya ulinzi ya Liverpool. Msimu huu, amejenga ushirikiano mzuri na beki kijana Jeremy Jacquet, jambo ambalo limeisaidia Liverpool kutofungwa bao lolote katika michezo mitatu mfululizo ya Ligi Kuu ya Uingereza (Premier League).

Licha ya kiwango chake bora, mkataba wa Mholanzi huyo unafikia tamati mwishoni mwa msimu, na hadi sasa hakuna taarifa rasmi ikiwa klabu hiyo itampa mkataba mpya.

AC Milan wameweka nia

Mwandishi wa habari za michezo nchini Italia, Carlo Pellegatti, amesisitiza kuwa Virgil van Dijk huenda akawa na safari ya kuelekea AC Milan. Kwa mujibu wa Pellegatti, mmiliki wa klabu hiyo, Gerry Cardinale, ana shauku kubwa ya kumpata beki huyo.

“Ninaendelea kusema kuwa Van Dijk atawasili Milan mapema au baadaye. Tutaona kama Cardinale atabadilisha mawazo yake au la, lakini naweza kukuhakikishia kuwa hilo si jina nililolitaja tu bila utafiti,” alisema Pellegatti.

Liverpool imekuwa na utamaduni wa kuwaruhusu wachezaji wakubwa kuondoka kama wachezaji huru pindi mikataba yao inapoisha, mfano wa karibu ukiwa ni Ibrahima Konate na Mohamed Salah ambao waliachwa kuondoka bure.

Micky van de Ven kama mbadala

Wakati tetesi za Van Dijk zikishika kasi, taarifa kutoka nchini Uingereza zinaeleza kuwa Liverpool imeshajipanga kwa ajili ya mrithi wake. Jina linalotajwa kwa nguvu ni beki wa Tottenham Hotspur, Micky van de Ven.

Beki huyo mwenye umri wa miaka 25 anatajwa kuwa chaguo sahihi la Liverpool kwa ajili ya kuimarisha safu ya ulinzi. Hata hivyo, usajili wake hautaenda rahisi kwani Tottenham wanahitaji kiasi cha pauni milioni 80 hadi 90 ili kumwachia staa huyo.

Ikiwa dau hilo litakamilika, Van de Ven atakuwa beki ghali zaidi katika historia ya soka duniani, akivunja rekodi iliyokuwa ikishikiliwa na Harry Maguire. Pamoja na Liverpool, Manchester United pia inatajwa kuwa miongoni mwa klabu zinazofuatilia kwa karibu hali ya beki huyo wa kushoto mwenye uwezo mkubwa wa kukaba na kuanzisha mashambulizi.